Onskuldige seun glo deur polisieman geskiet

Die Onafhanklike Polisie Direktoraat (Opod) ondersoek 'n saak van poging tot moord ná 'n 17-jarige seun na bewering twee keer deur 'n Conville-polisiebeampte geskiet is. Die voorval het Saterdag 20 Junie omstreeks 20:00 plaasgevind. Volgens 'n bron was die seun, 'n gr. 12-leerder aan Hoërskool Parkdene, en 'n groep vriende onderweg na Lawaaikamp nadat hy by 'n vriendin in Borcherds gekuier het, toe hulle na bewering deur lede van Conville-polisie in Brucestraat aangekeer is. Hy was ongewapen. "Hulle het die kinders begin jaag en van hulle het weggehardloop. Die slagoffer het egter stilgestaan en kon hoor hoe een van die beamptes vir die ander sê om hulle te skiet," sê die bron. Twee skote is na bewering deur 'n polisiebeampte afgevuur. Een skoot het die seun teen die ken getref en volgens die bron is die ander koeël by sy nek in en aan die anderkant uit. Die Suid-Kaapse polisiewoordvoerder, sers. Chris Spies, het die skietvoorval bevestig en gesê dat die ondersoek na Opod verwys is. 'n Navraag in verband met die voorval is reeds aan Opod gestuur, maar teen druktyd is geen terugvoer ontvang nie.