Huisgenoot Beste Resepte: Braai
ROOSTERKOEK-JAFELS
Die kookboekskrywer Neil Stemmet heet graag sy gaste welkom met ’n “voorbroodjie” – roosterkoek met ’n lekker vulsel. Ons maak dit in ’n jafelpan op die vuur gaar.
ROOSTERKOEKDEEG
4 x 250 ml (4 k) koekmeel 4 ml koeksoda
8 ml kremetart
5 ml (1 t) sout
60 ml (¼ k) botter
375 ml (1½ k) karringmelk AFRONDING olyfolie vir smeer en doop seesoutvlokkies of geroosterde saadmengsel
1 Deeg Sif die meel, koeksoda, kremetart en sout saam. Vryf die botter in, giet die karringmelk by en meng tot ’n stywe deeg.
2 Verdeel die deeg in 4 dele. Rol elke deel in ’n rol en sny elkeen in skywe van 4 cm dik. Druk elke skyf plat.
3 Vulsels Pak enige van die vulsels in die middel van die helfte van die deegskywe en plaas nog ’n skyf bo-op elkeen.
4 Maak ’n jafelpan goed op die vuur warm. Verf die binnekant met olie. Plaas die deeg-toebroodjie binne-in, maak toe en braai op die kole tot gaar. Draai gereeld om.
5 Afronding Doop die broodjie in olyfolie en sprinkel seesoutvlokkies of sade oor.