Geldsake: As jy nie kan werk
Jy moet dié 10 dinge weet oor ongeskiktheidsdekking
DIE doel van ongeskiktheidsdekking is om jou te beskerm teen die moontlike verlies aan inkomste weens ’n onvoorsiene mediese toestand en om jou die koste verbonde aan die toestand te help betaal. Dis belangrik om die voorwaardes en voordele te verstaan voor jy ’n polis kies.
1 Polisse
Daar is basies drie soorte polisse: dié wat vir die duur van die ongeskiktheid ’n maandelikse uitbetaling doen, dié wat net ’n enkelbedrag uitbetaal en dié wat die vorige twee opsies kombineer (dus sowel ’n maandelikse uitbetaling vir een toestand as ’n enkelbedrag vir ’n ander toestand). Doen voor jy kies jou huiswerk oor watter polis jou die beste sal pas. ’n Finansiële adviseur sal aan jou kan verduidelik hoe die polisse verskil, wat jy kan bekostig en uitwerk hoeveel dekking jy benodig. Maak seker jou polisdokument beskryf waarvoor jy alles gedek is, wat die vereistes en uitsluitings is en hoe uitbetaling sal werk.
2 Verswakking teenoor ongeskiktheid
Versekeraars tref ’n onderskeid tussen verswakking en ongeskiktheid. Jy moet weet wat die verskil is om jou polis se voordele te verstaan.
As jy ongeskik is, kan jy nie jou werk doen en ’n inkomste verdien nie, terwyl verswakking ’n fisieke of funksionele gebrek is wat nie jou werkvermoë raak nie, verduidelik Ryan Chegwidden van Hollard Life. Tipese voorbeelde van verswakking is om ’n been te verloor of so te beseer dat jy dit nie meer kan gebruik nie. Ongeskiktheidsvoordele se doel is om op te maak vir jou toekomstige verlies aan inkomste, terwyl verswakkingdekking onverwagte uitgawes dek wat met verswakking gepaard gaan.
3 Premies
Premies verskil volgens elke versekerde se ouderdom, beroep, gesondheid, rokerstatus, die hoeveelheid dekking en die uitbetaling wat jy graag wil kry. Hoe meer omvattend die dekking, hoe hoër is die premie in die algemeen, verduidelik Ryan.
Gestel ’n 30-jarige, nierokende vrou wat ’n boekhouer is, neem dekking uit vir ’n enkelbedraguitbetaling van R2 miljoen. Haar maandelikse premie vir basiese verswakking sal R168,02 wees. As sy omvattende ongeskiktheidsdekking uitneem, sal die premie R227,86 wees.*
4 Jou werk
As jy ’n voltydse werknemer is, vind uit of jy reeds deur jou werkgewer ongeskiktheidsdekking het. Indien wel, maak seker hoeveel beskerming dit jou bied; dit is dalk minder as wat jy graag sou wou hê.
5 Uitsluitings
Bestaande toestande wat ’n groot risiko inhou vir toekomstige ongeskiktheid, soos psigiatriese, gewrigsof rugtoestande, word gewoonlik uitgesluit.
Maar as jy die toestand ontwikkel nadat jy die polis uitgeneem het, moet jy steeds gedek word. Sou die ongeskiktheid die gevolg wees van deelname aan terreur, doelgerigte onwettige optrede en selftoegediende beserings, sal die eis verwerp word.
Gevaarlike sportsoorte of beroepe is ook gewoonlik van dekking uitgesluit.
6 Ouderdomsperke
In die algemeen betaal polisse net uit tot op die ouderdom van 65-70 jaar, maar daar is nuwe polisse op die mark wat vir jou hele lewensduur sal uitbetaal, sê Ryan.
7 Wagtydperk
Daar kan ’n wagtydperk van drie tot ses maande wees voor die uitbetaling gedoen word. Premies moet steeds tydens die wagtydperk betaal word. Baie maatskappye het egter nie wagtydperke nie en sal die voordeel betaal sodra die ongeskiktheid bevestig word.
8 Algemene oorsake
Spier- en skelettoestande soos artritis, rugpyn, ruggraat- en gewrigsprobleme is van die grootste redes vir ongeskiktheidseise. Heelwat van dié eise is ook weens motorongelukke. Die grootste risikogroep daarvoor is mans jonger as 30, gevolg deur mans tussen 41 en 50, sê Ryan.
9 Belasting
Daar is belastingtoegewings vir mense met ’n gestremdheid, byvoorbeeld uitgawes soos aanpassings aan ’n huis vir ’n rolstoel. Gaan na www.sars.co.za, klik op Individuals, dan op Tax During All Life Stages and Events en eindelik op Tax and Disability om nog hieroor uit te vind.
10 Ongeskiktheidstoelae
As jy weens ’n fisieke of geestesprobleem langer as ses maande nie kan werk nie, kan jy by die regering vir ’n ongeskiktheidstoelae aansoek doen.
Daar is vereistes as jy steeds ’n inkomste verdien. Gaan na www.gov.za, klik op Services, kies Services for Residents en dan Social Benefits.