’N KANNIEDOOD-BLOM
Jy sal die koningsprotea die hele pad van die Cederberge in die Wes-Kaap tot Grahamstad in die Oos-Kaap aantref; van die kus tot 1 500 m bo seevlak.
As gevolg van die verskillende toestande in dié gebied kan die koningsprotea se blomtyd, grootte en kleur wissel. Die plant se taai, leeragtige blare beskerm dit in die droë, warm somers en nat, koue winters. Dit het ook ’n groot, lang penwortel wat tot diep in die grond dring om die plant vog te gee.
Die dik, ondergrondse stam bevat sluimerende knoppe wat die plant veldbrande help oorleef. Al is die meeste van die plant dalk weggebrand, sal dit uit dié ondergrondse knoppe teruggroei.