BO ALLES, DIE LIEFDE
Gedurende die inperking is dit haar Timmy se liefde wat Demi-Leigh dra
NIEMAND sou kon voorspel hul swierige troue sou een van die min glansgeleenthede op die 2020-kalender wees nie. In die ses maande sedert hul mooiste dag moes die voormalige Mej. Heelal Demi-Leigh Nel-Peters en Tim Tebow nie net gewoond raak aan die getroude lewe nie. Hulle moes ook soos die res van die wêreld aanpas by die nuwe werklikheid nadat die covid-19pandemie die wêreld tot stilstand geruk het; ’n werklikheid waarin reis en glansgeleenthede nie moontlik is nie.
Weg was die stralerjakkerbestaan waaraan die paartjie so gewoond is danksy hul beroepe – sy as model en hy as bofbalspeler – en die liefdadigheidswerk wat hulle doen. Skielik was dit net hulle, mnr. en mev. Tebow, tuis in hul nuwe woning op ’n gholflandgoed in Florida.
Met die aanbreek van die inperking – ook hier in Suid-Afrika – het Demi-Leigh haar aanhangers in die sosiale media moed ingepraat. “Dis vreemde tye vir ons almal. So ek moedig julle aan om aan opbouende aktiwiteite deel te neem. Maak die beste van die tyd wat ons op hande het en versprei liefde en vreugde in jul virtuele gemeenskappe, want ons sal saam deur hierdie tyd kom.”
En dis presies wat die pasgetroudes ook gedoen het. Hulle het gedurig prettige video’s geplaas waar hulle in die gimnasium oefen, dans of inspirerende boodskappe met hul volgelinge deel.
“Ons speel ons gunstelingbordspeletjies, maak ons gunstelingkos en luister na nuwe luisterboeke, geestelike dagstukkies en musiek,” het Demi op Facebook geskryf. “Ek het ook die tyd gebruik om planne te ontwikkel vir die projekte wat ek graag wil begin. Ek loop nou al te lank met idees rond, en dis tyd om dit ’n werklikheid te maak. Idees sonder enige aksie het geen waarde nie.”
Sy het ook kort voor haar 25ste verjaardag op 28 Junie haar voorkoms verander deur haar kenmerkende lokke in ’n splinternuwe, korter haarstyl te laat sny. “Ek droom al te lank daarvan om my hare te sny. Die lewe is te kosbaar om nie die dinge te doen wat jy graag wil doen nie,” skryf sy by ’n foto waar sy met die nuwe styl spog en uitbundig lag.
Met haar verjaardag verlede maand het gelukwensings van oor die wêreld ingestroom