Eyabesifazane iphethwe ngenkonzo
IKOMITI lenhlangano yabesifazane ethekwini namaphethelo abesemsebenzini weNkosi, phecelezi Women in Ministry, belihlele indumezulu yenkonzo eba minyaka yonke yokugubha inyanga yabesifazane egoqwe ngolwesine.
Kule nkonzo ebingomgqibelo odlule ediakonia Convention Centre nobesekungeyesine, kushumayele kuyo umfu Thandi Mngoma we-united Congregational Church in Southern Africa ozinze eclermont.
Isifundo sale ntshumayelo besisekwe ngezwi lenkosi elifundwe encwadini Izaga 31:10-25 edumisa owesifazane okhutheleyo, indikimba yayo isevesini 25 eligcizelela ukuthi amandla nesithunzi somuntu wesifazane kuncike endleleni embatha ngayo.
Umfu Mngoma uthe lapha kuvela izinhlangothi ezimbili, olubi noluhle kule ndikimba:
OKUBI
* Okokuqala akuphawulile lapha wukuthi indima efundiwe iyisibuko somphakathi lapho abesilisa becindezela abesifazane. * Owesifazane uvezwa engumuntu okumele enze okulindelwe ngabesilisa.
* Uyatuswa hhayi ngokuthi ungubani kodwa ngalokho akwenzayo. * Uyisisebenzi sendoda yakhe nabantabakhe.
OKUHLE
* Lapha sivezelwa owesifazane ohlakaniphile.
* Ukhuthele futhi wenza umndeni wakhe uhlale uhlangene. * Ungumuntu onakekelayo. * Uvezwa futhi engozinikele. * Ukwazi nokusungula imisebenzi ezodala inqubekela phambili, uhamba phambili emabhizinisini.
* Akagcini nje ngokusimama. kepha akwenzayo kuyachuma kakhulu.
* Akeneliseki uma engatholile okuseqophelweni eliphezulu. * Uyakwazi ukusebenzisa onke ama-thuba amvelelayo.
Ivesi 25 lale ndima liveza amagama amabili: amandla nesithunzi kumbe ukuhlonipheka. Amandla lawa akuyena ngaphakathi, okusho ukulawula imizwa yakhe ngobuhlakani. Amandla akhe uwathola emthonjeni ongashi, kunjalo nje lawa mandla akhe aletha intokozo kwabathandiweyo bakhe.
Umfu Mngoma uthe nokho lokho makungasho ukuthi owesifazane makaphenduke ithuluzi lokusetshenziswa abanye. Isithunzi noma ukuhlonipheka ukuthola kunkulunkulu, nokumenza ahlonipheke ngokuhlonipha kwakhe abanye.
Empeleni owesifazane onjalo usuke embathiswe ukulunga kukaNkulunkulu, usho kanje. Ezinye izimpawu zalona wesifazane odunyiswayo azithola kunkulunkulu yilezi: Akabaxhaphazi abanye; Umndeni wakhe uyawunakekela; Bonke abaseduze naye bathola ulwazi ngokubonisana;
Akayona into ehlala endlini sonke isikhathi kepha uyasebenza ngenkuthalo;
Amandla akhe asekubhekeleni abanye;
Uneziphiwo eziningi; Akesabi ukuphikelela kulokho afisa ukuba yikho.
“Ngenxa yalawo mandla owesifazane onjena uthola ukuhlonishwa,” kuphetha umfu Thandi Mngoma.