Imizwa yosaziwayo ngomnu Zuma
Bancoma amagalelo akhe ekuqashweni kamaciko emikhankasweni yeqembu
KULELI sonto lugcine lugobile uphondo kobengumengameli wezwe, umnu Jacob Gedleyihlekisa Zuma, waliphonsa ithawula, washenxa esikhundleni.
Kule minyaka eyisi-9 umnu Zuma ehola izwe, kuningi okwenzekile. Emkhakheni wezikaqedisizungu kugqame ukuphumela obala kosaziwayo abeseka i-african National Congress (ANC). Bebebonakala emicimbini eyahlukene, abanye bethatha izithombe naye.
Umnu Zuma ubaziwa ngobuciko bakhe nangemidanso abeyishaya aze akhase phansi nokuyinto ebibukeka ithokozelwa ngabaningi. ILANGA Langesonto likhulume nosaziwayo abebeke babonakale emicimbini yaleli qembu ukuzwa imizwa yabo ngokwesula kukamengameli Zuma esikhundleni.
UDJ Tira udalule ukuthi uyaseseka isinqumo seqembu sokuhoxisa umnu Zuma esikhundleni. “Umnu Zuma siyohlale simhlonipha ngemisebenzi yakhe ayenzele izwe.
"Okubalulekile wukuthi ukwazile ukuhlonipha imiyalelo yeqembu.
"Ngiyathemba ukuthi nomengameli ongenayo uzokwazi ukuqhubeka lapho kushiye khona umnu Zuma,” kusho lo DJ oyintandokazi kubathandi bomculo.
UDJ Happygal ongomunye wodj besifazane abahamba phambili kuleli, uveze ukuthi umnu Zuma uwaphathe kahle kakhulu amaciko, kanti bekumnandi uku- hamba imikhankaso yeqembu ebinaye (umnu Zuma).
“Ngiyathemba ukuthi nobuholi obungenayo buzoqhubeka busebenze namaciko. Uma beqhubeka nokusimema sizoba yingxenye yemikhankaso. Siyambonga ngasenzele khona singamaciko,” kusho lo DJ onengoma edlalwa kakhulu kulezi zinsuku emsakazweni esihloko sithi “Ukuphila”.
UDJ Sbu uveze ukuthi akuthokozele ngomnu Zuma wukuthi ngaphambi kokushiya esikhundleni umemezele imfundo yamahhala. “Njengomuntu oyizwa ngaphakathi indaba yemfundo, kungijabulisile akwenzile, ngakho kimina uyohlale njalo engumholi oyibekile induku ebandla.
"Ngiyihlonipha kakhulu imisebenzi yakhe nakuba ngingeke ngingene kwipolitiki kodwa okwemfundo kimina yikhona engimkhumbulela khona,” kusho UDJ Sbu onesiteshi sakhe kwiInternet, imassiv Metro.
Untokozo Dlamini olingisa umastermind kuzalo, uthi kubuhlungu ukuthi ushiye engakasiqedi isikhathi sakhe. “Okuhle wukuthi usezothola ithuba lokuziphumulela nomndeni wakhe. Bengimthanda ngoba ubengumholi oqotho nobesamukela ngemfudumalo uma sihlangana naye,” kusho umastermind engeza ngokuthi ubengathanda ukuba umnu Zuma aliqede ihlandla lakhe, kodwa uyasihlonipha isinqumo seqembu futhi uzimisele ukumeseka nomengameli omusha wezwe.
Udelly Malinga abaningi abazomkhumbula ngosarah kwigenerations endala, uthi iningizimu Afrika ibuswa ngokwentando yeningi, yingakho uma abantu sebekhulumile akukho obekungenziwa. “Baningi eqenjini abazwakalise ukuthi akasakulungele ukuphatha ngakho kumele intando yeningi isebenze.
"Usebenzile yena futhi ungumholi oqotho. sekuyisikhathi sobuholi obusha okumele nabo sibunike ukwesekwa okufanele, sibone ukuthi busiyisaphi,” kusho le nkakha yomlingisi esebenza kakhulu ngokuthuthukisa abantu abasha emlazi.
UDR Malinga wodumo lwemidanso ejabulisa abantu, uveze ukuthi umnu Zuma ukwenzile abekumele akwenze. “Ungumuntu, unamaphutha ngakho abantu bayohlale bekhuluma ngoba nakuyena umnu Ramaphosa basazokhuluma ngokuhamba kwesikhathi.
"Eqinisweni kukhona okuhle umnu Zuma akwenzile ngakho akumele kugqitshwe ngamaphutha akhe,” kusho udr Malinga engeza ngokuthi phakathi kokuhle akwenzile wukusatshalaliswa kwemishanguzo yesandulela ngculaza, ukulungiswa kwezikole nokwakhiwa kwezikhungo zemfundo ephakeme. lucky.cain@ilanganews.co.za