KAZI ISIPHATHELENI I-HARVEST?
BENGITHI ngeke ngisho lutho ngomdlalo oqale ngoMsombuluko, iHarvest, okhonjiswa esiteshini sikamabonakude esizimele i-etv.
Lo mdlalo ukhonjiswa ngo-9:30 ebusuku. Bengithi ngeke ngiwuthinte nje nhlobo kuze kube uyakhombisa ukujula kwawo noma nje kuze kube ngiyaqonda ukuthi unomthelela muni kubantu.
Kungenzeka ukuba ngiyakhohliseka ngokubona uhla lwabalingisi kodwa impela baphethe abantu abasezingeni eliphezulu. Yize kukhona abangawuqinisi umqwazo kumina kodwa sekumele ngilinde ngibone ukuthi bangiphatheleni.
Phela ngiyazi ukuthi uma ngibhala ngomdlalo kusuke sekulindeleke ukuba ngigxeke kuphela kodwa ngiyancoma lapho kufanele ngincome khona.
Ngiyathemba ukuthi njengoba oqoke abalingisi enze umsebenzi oncomekayo nje, kanjalo nababhali nabaqondisi balibambile iqhaza ekutheni lo mdlalo ube yimpumelelo. Mangiqale ngokubancoma ngesikhathi okhonjiswa ngaso - phela kuyinkinga ukufika ufune ukuncintisana noGenerations: The Legacy ekhonjiswa kuSABC 1 ngo8:00 kusihlwa, noma ufune ukuncintisana neSibaya esikhonjiswa kuMzansi Magic 161 ngo-8:30 kusihlwa. Lokho kungakubangela enkulu inkinga ngoba lezi ngezinye zezinhlelo ezinabalandeli bazo, okuthi noma sezibheda kodwa baqhubeke nokuthembeka kuzona.
Masibuyele kwiHarvest manje - ngingathanda ukuwubuka lo mdlalo uqhubekela phambili futhi ushisa izikhotha. Phela kulo mdlalo kukhona uMasasa Mbangeni oseke wanqoba izindondo ngokuba ngumlingisi ovelele kanti kulo mdlalo nguye olingisa indawo ephambili kaCelia ongumholi wabafelokazi njengoba naye egcine engumfelokazi.
UCelia wenza noma ngabe yini ukugcina umndeni wakhe umile, ngisho ngabe lokho kusho ukuthi akhokhele abomthetho noma alale nezigebengu ukuze kuvikeleke umndeni wakhe.
Phakathi kwabalingisi abanamagalelo kulo mdlalo ngibala uMuzi Mthabela olingisa indawo kaRichard, uSimphiwe Mini olingisa indawo kaZimba, uNat Ramabulana olingisa indawo kaMxolisi, uKagiso Modupe (Thabiso), Rami Chuene, Fezile Makhanya, Thenjiwe Moseley, Lebohang Motaung, Batsile Ramasodi noVatiswa Ndara olingisa uClementine.
Engikuqaphele kakhulu wukuthi kuthathwe abalingisi abaziwa kwiScandal.
Mathule sibheke ukuthi kuzoqhubekani.