MASIQHUBEKENI NOKULWA NENDLALA NGOBUCHWEPHESHE
KUYAJABULISA ukuthola nokuzwa ukuthi esikhuluma ngakho kule ngosi kunomthelela omkhulu futhi omuhle kakhulu kubantu abaningi ezweni.
Ukuzwa ngelinye lamalunga omphakathi ukuthi esasikubhale mayelana nokuziqalela elakho ibhizinisi, ngokuthenga izimpahla ezifana nezinwele zokufakelwa ngokusebenzisa i- website ethi www.alibaba.com, sekwenze ukuba abafundi besikole beziqalele awabo amabhizinisi okuthenga izimpahla phesheya kwezilwandle, badayisele abanye abafundi.
Lokhu kwenza kube lula nokuyithola impahla yakho ngoba nezokuthutha zakwaDHL ziyalekelela kakhulu.
Omunye ubengazisa ukuthi kwamsiza kanjani ukufunda mayelana ne-App okwazi ukuyisebenzisa ukuze ukwazi ukuthenga nokudayisa ama- share ngohlelo lweJohannesburg Stock Exchange (JSE), etholakala mahhala kwi- internet ngoba kwasekukhona abazama ukumqola ngokumdayisela i- software etholakala mahhala kodwa bona bemdayisela ngo-R21 000.
Yingakho nginomkhankaso wokuhambela izindawo ezifana noNewcastle, Ladysmith, Vryheid, Dundee, Empangeni nako-Port Shepstone ukucobelela ulwazi lokusebenzisa ubuchwepheshe bezimali ukulwa nendlala.
Silindele futhi ukuzwa ngekusasa lwezobuchwepheshe ekuthuthukiseni umnotho ngaphansi kohlelo lweFinancial Technology njengoba kukhona i- conference eqale izolo ngoLwesithathu nephelayo kusasa lapha eThekwini enesiqubulo esithi, "Era of Disruption" lapho kukhulunywa ngobuchwepheshe obuthinta izimali njengezinto ezifana noCashsend, eWallet, Bitcoin, PayPal nezindlela eziningi zobuchwepheshe besimanje.
Ngiyabakhuthaza abafundi bale ngosi ukuba baqhubeke nokuthumela izihloko abathanda ukuba sibhale ngazo futhi basazise lapho besizakala khona.
*USboniso Mtshali uyi-IT Entrepreneur | Forex Trader | Investor | Author | Financial Coach | Public Speaker. Ungaxhumana naye kanje: Mob: +2778 210 8384 Email: sboniso@afronicdata.co.za Facebook: Sboniso Mtshali