Ubona bezophenduka izimpelesi zeSundowns
Lsimanga umqeqeshi evuma induku kungakadlalwa
UVUMA induku kungakadlalwa umqeqeshi wePlatinum Stars eqhathwe neMamelodi Sundowns kowe-Absa Premiership namuhla ngoLwesine ngo-18h00 eLucas Moripe Stadium, e-Atteridgeville.
Lo mdlalo umqoka kuwona womabili la makilabhu njengoba enezinjongo ngawo. ISundowns ijaha iWits ebanga nayo isicoco seligi, kanti iPlatinum Stars izama ukubalekela izembe njengoba isendaweni engeyinhle kwi- log.
UCavin Johnson ocija iPlatinum, uthi mancane kakhulu amathuba okuthi ezakhe zinganqoba lo mdlalo uma zisadlala imfishimfishi yebhola lena eziyidlalayo. Ukusho lokhu nje, yingoba ezakhe ziguqiswe yi-Ajax Cape Town ngo-2-0 koweligi ngeSonto ntambama eCape Town Stadium.
“Ngesinye isikhathi iqiniso kufanele ulikhulume linjengoba linjalo, uma ngibuka indlela esidlala ngayo ngiyiqhathanisa neyeSundowns kangiboni ezami ziyehlula. Idlala ibhola eliseqophelweni eliphezulu kanti ezami zizenzela okwazo. Kodwa-ke lokho kakuchazi ukuthi sizoma nje sibuke iSundowns izenzela kithina nathi sizolwa. Sidinga okungenani ama- phuzu ali-10 ukusuka kule ndawo yezembe esikuyona. Kulo mdlalo kuzofanele silwe yize ubukeka uzokuba nzima,” kusho uJohnson.
UPitso “Jingles” Mosimane ongumqeqeshi weSundowns, uthi kawukho umdlalo olula manje njengoba abantu becabanga.
“Engingakusho nje wukuthi le nkomishi kayikho ezandleni zethu njengamanje kodwa kufanele sizame ukuwunqoba lo mdlalo ngoba kasazi ukuthi kuzogcina kwenzakaleni. Okufanele sikwenze wukuthi siqhubeke nokulwa kuze kube sekugcineni,” kusho uMosimane.
Ngesinye isikhathi iqiniso kumele ulikhulume linjengoba linjalo.