UGEQE AMAGULA NGOKUFA KUKAZAKWABO
LIHLUBE udlubu ekhasini iphoyisa ebelethula ubufakazi eNkantolo eNkulu yaseThekwini ngoLwesihlanu ecaleni lokuhlaselwa kwamaphoyisa amabili aseNanda, enyakatho yeTheku kwafa elilodwa mhla zingama-22 kuMandulo (September) wezi-2015.
UConstable Lungisani Majozi - ongufakazi wombuso - ovezele u-Adv Xolile Ntshulana oyibamba lejaji ukuthi useneminyaka eli-10 esembuthweni wamaphoyisa, utshele inkantolo ukuthi mhla zingama-24 kuMandulo, ucelwe yiphoyisa elingaphezulu kunaye ngokwesigaba ukuba abe ngumshayeli njengoba ummangalelwa wesibili, onguMnu Lindokuhle Mchunu (18), ubeyokhomba lapho okwenzeke khona isigameko.
“Bengihamba nabanye ozakwethu sisuka ePhoenix (enyakatho yeTheku) silibangise eNanda lapho okwenzeke khona isigameko. Ummangalelwa wesibili ubekhuluma isiZulu kanti omunye ukaputeni ebesihamba naye ekhuluma ngesiNgisi.
"Omunye wosayitsheni ubehumushela ummangalelwa ngesiZulu, ahumushele lo kaputeni ngesiNgisi. Sichithe cishe ihora sindawonye nalo mmangalelwa futhi kangizange ngibone kulimala kuyena.
"Uma kusuke kukhona umuntu oboshwayo, ngike ngimbuze ukuthi ngabe kukhona yini lapho alimele khona ukuze ngizokwazi ukufuna usizo,” kusho uConst Majozi.
Ummeli kammangalelwa wesibili, u-Adv Mondli Qulo, ubuze uConst Majozi ukuthi ngabe uke walibuza yini ikilayenti lakhe ukuthi lilimele. Uphendule wathi akazange alibuze ngoba belingenamanxeba futhi belingatshengisi zimpawu zokulimala.
U-Adv Qulo utshele uConst Majozi ukuthi umuntu uma engenawo amanxeba okulimala lokhu kusuke kungasho ukuthi akalimele. UConst Majozi uthe: "Kangizange ngimbuze ngoba benginesiqiniseko sokuthi ukaputeni ubezombuza.”
Kuleli cala ummangalelwa wokuqala nguMnu Sabelo Mkhize (26) owesibili nguMnu Mchunu kanti owesithathu nguMnu Sboniso Khubisa (19).
Babhekene namacala ali-12 abucayi okubalwa kuwona elokubulala ngenhloso uSgt Vusimuzi Moyana, elokuzama ukubulala uSgt Jabu Jojisa, elokutholakala nezibhamu ezingekho emthethweni, elokuthumba, elokwephula umthetho wezibhamu nelokukhomba amaphoyisa nge-AK 47. Icala liyaqhubeka.