Uphume ehlehla umhloli esikoleni
Abafundi badinwe isenzo sokuxoshwa kothisha
UGELEKEQELE kuhle kwembabala isikakwe ngamaphisi umhloli wezikole eMlazi, eningizimu yeTheku ngesikhathi abafundi abebethukuthele begane unwabu eMlazi Comtech High School, kuthi mabamudle bamfele bedinwa wukuvalwa kwesikole ngemuva kokuxoshwa kothisha abali18 bengaholile ngeledlule.
UMnu Petros Mdabe ongumhloli, uphume esegadwe wubuholi beSouth African Democratic Teachers‚ Union (Sadtu) emhlanganweni obusehholo lesikole obuhlanganisa abazali nabafundi ebachazela ngezinxushunxushu ezikhungethe lesi sikole.
Kuze kwadingeka ukuba ayocashiswa ehhovisi ukuze aphephe kubafundi abebethukuthele bethelwa ngamanzi. ILANGA libike kabanzi ngeledlule ngodaba lokuxoshwa kothisha abali-18 abaholelwa ngabazali ngenxa yokuthi isikole sikhala ngokuthi kasinayo imali yokubaholela.
Selokhu kuxoshwe labo thisha, kakufundwa kulesi sikole abafundi behla bayenyuka emagcekeni kanti othisha bashaya itoyitoyi ngasesangweni lesikole, balibeka ngembaba elokuthi kababuyeli emakilasini ingakalungiswa inkinga yalabo thisha okuthiwa baxoshwe ngosuku obekumele bahole ngalo.
Kwenzeka lokhu nje, izikole eziningi sezilungiselela ukuhlolwa kwesigaba sesibili sokuvalwa kwezikole. Kuthiwa ngoLwesine abazali bezingane ezihlala ngaphakathi esikoleni, bathole imiqhafazo ebayalela ukuba bayolanda izingane zabo esikoleni ngenxa yezinxushunxushu.
Le miqhafazo ibingacacisi ukuthi zizobuyela nini esikoleni. NgoLwesihlanu abazali bazifikele mathupha kulesi sikole befuna ukuthola kabanzi ngokuqhubekayo njengoba bebengakaze bachazelwe lutho ngokuxoshwa kwalabo thisha sekuqhamuka imiqhafazo ebatshela ukuthi mabalande izingane zabo esikoleni.
Ngesikhathi kunomhlangano ngoLwesihlanu, abafundi bebethi kabafuni ukukhuluma noMnu Mdabe, makalande uzakwabo, uMnu Mbusi Mvuyane (ongumhloli naye) okunguyena oxoshe labo thisha, ukuze achaze ukuthi ubaxosheleni. Uphume engasakushongo abekuthunyiwe kwazise abazali nabafundi bebengasafune kuzwa lutho. Ngesikhathi esezama ukuphuma ehholo, uMnu uMdabe, abafundi bavale umnyango, zayima emthumeni.
Bebethi makuqale kufike uMnu Mvuyane. Abafundi bamgxavune ngamawashingi eseyongena emotweni yakhe, kwaphoqeleka ukuba ayovalelwa ehhovisi kwabalekiswa nemoto yakhe eduze kwabafundi.
ILANGA lithole ukuthi izolo ngeSonto kubizwe umhlangano ophuthumayo wabazali beyocaciselwa kabanzi ngezinkinga ezikhungethe lesi sikole.
Okhulumela uMnyango wezeMfundo KwaZulu-Natal, uMnu Muzi Mahlambi, uthi bese bezwile ngezinxushunxushu ezikhungethe lesi sikole, abahloli bayalulungisa lolu daba balindele ukuba abafundi babuyele esikoleni lingakapheli leli sonto.
“Sinethemba lokuthi abafundi bazobuyela esikoleni kusukela kasasa (esho namhlanje ngoMsombuluko) ," kusho uMnu Mahlambi.