Ukushiya ukhathele uMkhathazi
UZIBONA esazoya kude kakhulu ngomculo kamasikandi ngenxa yokugaba ngephimbo elehlukile kwabanye abaculi, okuyilona elenza uhlukaniseke umculo wakhe kule ndima njengoba abaculi abaningi sebecula okuthi makufane.
UMzamo “Mkhathazi” Nsibande (34), yinsizwa yaKwaHlabisa eMdletsheni eMkhanyakude, enyakatho-mpumalanga yeKwaZuluNatal ehlonishwayo kumasikandi emuva kokuqhulula inoni elishise izikhotha elithi “Leli Phimbo,” okuthe kusajatshulelwa lokho yabuya isihambisana noSthembiso Mroza Fakude kanjalo noMzovukile “Jaiva” Khanyeza, baduma ngengoma ethi “Van damme”.
UMkhathazi uyayishaya ingoma futhi usezibonakalisile emculweni wesintu, ubalwa nezinkunzi kanti nasesiteji ukushiya ukhathele. Nguyena umculi okwaziyo ukuphonsela inselelo uSgwebosentambo uma kujatshuliswa izihlwele ngengoma. Le nsizwa iyazihlonipha. ILANGA likhulume nayo ukuthola kabanzi ngayo. Le nsizwa uma izihasha izisho kanje:
“UMkhathazi wezinsizwa ezijabulela Ukuphila ngezithukuthuku zamanye amadoda. Inkobongela emanxebanxeba, Uqhwakela phezu kwekhanda labanumzane kungabi ndaba zalutho. Is’phukuphuku senkunzi ekhwele izinkomazi ngasekhanda, Umqansa wangakithi eKhongela omfishane Owehlula izikorokoro zamantombazane Zahluleka zabuyela emuva ngoba zazithi Zizozicelela uthando kokaMdlanyoka zafika zehluleka. Umfana kaSfuba singungubele Mhla sabhoboka umuntu uyozi zwa izindaba. Ndoda ayikhulumi kodwa kukhuluma imisebenzi yayo emihle. Dear Msombuluko, wongisiza utshele uLwesibili, Atshele uLwesithathu ukuthi uLwesine Ucela uLwesihlanu ngeSabatha ntambama Yimina ozithobayo iSonto,”
UMkhathazi uthi elokuthi unguMkhathazi wezinsizwa, yizihasho aziphiwe nguMshefana okuyinsizwa yaseziMbidleni, eMkhuze, ebihasha inkosi yendawo. Uthi lezi zihasho uzithole ngokuthi yena ubengumfana omncane emsebenzini ephethe izisebenzi ebezenza inkohlakalo, obekuthi uma esezibambile elwa nenkohlakalo, bese kuba kubi.
Kuqhamuke kanjalo ukuthi ulwa nezinsizwa ezithanda ukuphila ngezithukuthuku zabanye. Uyinkobongela emanxebanxeba ngoba ubebizwa kanjalo uma esezihola izinsizwa ngengoma kanti nasesikoleni nguyena obedonsa ifolo lengoma.
Uthi uzibiza ngoqhwakela phezu kwekhanda labanumzane ngoba nguyena umculi wokuqala okwazile ukulwa nomnumzane wangakubo eMkhanyakude obexhaphaza amaciko endawo.
“Kunobaba obesicindezela ngoba nakhu ebenikwe amandla wuhulumeni ukuba ahlele imicimbi bese ezinothisa yena nomndeni wakhe. Yimina umculi owakwazi ukumqonda ngqo ngenxa yokuhlukumezeka obekwenzeka kithina kugqanyiswa abathandwa nguyena kuphela, esivalela ngaphandle kube sengathi kabekho abaculi eMkhanyakude,” kusho uMkhatha- zi.
Uthi kunomqansa wangakubo ongakhwelwa mbongolo, yingakho-ke naye ethi uyinsimbi kayigobi ngoba kukhona nezintokazi ebezizama uthando kodwa zehluleka. Ezinye izihasho ngezikayise, ube esedlala ngobuciko ehlanganisa izinsuku kulesi sitanza sokugcina.
UMkhathazi uthi umculo usuka kude nawo ngoba nasebuncaneni bakhe bamtshela ukuthi ubethanda ukucula izingoma zeSoul Brothers. Utshele ILANGA ukuthi kuthe ngokuhamba kwesikhathi kwaba nengoma yezinsizwa ngakubo.
Ngenxa yokuthi isibongo sakhe sikhulu kakhulu endaweni yakubo, bebegida bewuzalo lwaso kuphela. Uthi ngonyaka wezi-2008, uMasipala waKwaHlabisa usungule usoseshini wengoma wathi makuhlanganwe. Uveze ukuthi yilapho kuqale khona ukugqama kwekhono lakhe kanti nasesikoleni ubehlonishwa kakhulu ngengoma futhi ezinye izikole bezazi kahle ukuthi ngeke zimelane nesikole sakhe.
“Bekuthi noma zivalelwe izinsizwa endlini nginikezwe ithuba lokuvumisa, bengiyigoso. Bengingumuntu ophambili kakhulu engomeni kashameni. Namanje ngisagida emakhaya, kangifakile ekhanda ukuthi ngingumculi,” kusho uMkhathazi.
Ngonyaka wezi-2008 usungule iqembu elibizwa ngaMagusheshe esebenzisana noMnu Xolani Zondo obekwazi ukushaya isigingci. Uthi kuthe besakoqozisa lokho kwafika uMnu Shishiliza Mkhize wangakubo eMkhanyakude wezwa umsebe-nzi wabo kanti uMnu Mkhize ungumlandeli wokuqina waMageza Amahle futhi ujwayelene noMnu Sxhobo Mpungose we-Amnon Music Production, obephethe Amageza ngaleso sikhathi wabacelela ukuba abarekhode nebala wavuma uMpugose.
“USxhobo wawuthanda lomsebenzi wasifaka ngaphansi kwenkampani yakhe sayiqopha albhamu yokuqala sicula phambili sishintshana nenye insizwa yakwaMdletshe ngenxa yezinkinga ngabe sengiphuma owami umuzi ngasungula iqembu aMagudla ngonyaka wezi-2010 ngisebenza nge- demo, kwathi ngowezi-2011 ngahlangana noMasefana Ndlovu wawuthanda umsebenzi wami wangiqopha ngowezi-2011 i-albhamu ethi “Vele Asazani”,” kusho uMkhathazi. Uthi iqembu aMagusheshe ngelakhe, nguyena umphembi walo nakuba elishiyele izinsizwa zakwaMkhize abesebenza nazo. Ngonyaka olandela lapho izinto kazihambanga kahle waze wabuya ngowezi-2013 nge-albhamu ethi "Solve For X" kwalandela ethi “Voicemail vs Sivalela Oxamu" ehambe kakhulu emakethe nakuba ingalitholanga ithuba lokuduma emsakazweni. Uthi kuhambe kwahamba wabona ukuthi ukuzibiza ngeqembu sengathi yikhona okumfakela izinkinga wabe esekhetha ukuzibiza ngegama lakhe ngqo. Ubuyile ngowezi-2015 wakhipha uMkhathazi obegabe ngengoma ethi “Leli phimbo” okuyingoma emgqamisile kakhulu. Le nsizwa ishadelwe nguKaMasondo ngoZibandlela (December) wezi2012. Njengamanje isiqedile ukupheka umsebenzi omusha esitudiyo kanti ekupheleni konyaka izoqala izinhlelo zokushutha iDVD.
Kunobaba obesicindezela ngoba nakhu ebenikwe amandla wuhulumeni...