Amandla eLANGA bethola uthisha
Bebeshoda ngothisha weSayensi neMaths
USUKUMELE phezulu uMnyango wezeMfundo KwaZulu-Natal wangenelela ngokukhulu ukushesha odabeni lwabafundi baseMphezeni Secondary School, KwaNyembe, eShowe, enyakatho-mpumalanga yeKwaZulu-Natal, abebekhala ngokungafundi ngenxa yokungabi naye uthisha wezifundo ezimqoka, okuyizona ezibhekwe kakhulu ezikoleni.
ILANGA libikile ngoMsombuluko owedlule mayelana nesikhalo sabafundi sokungabi naye uthisha weSayensi neMaths kulesi sikole, obekukhalisa kakhulu abafundi bakamatikuletsheni - kwazise bayisibuko sesikole.
Omunye wabafundi ufonele leli phephandaba ecela ukuba kwaziswe umnyango ngesikhalo sabo. Uthe lezi zifundo bagcine ukuzifunda kuNhlolanja (February).
Le nkinga ibihlasele uGrade 10, 11 no-12 njengoba kubikwe ukuthi uthisha obezifundisa ubengenazo iziqu zobuthishela, ubefundisa ngeNated Course wase exoshwa wumnyango wangasivalwa isikhala sakhe.
Abafundi bakulesi sikole kabakwazanga ukubhala izivivinyo zesigaba sokuhlolwa kokuqala enyakeni. Bebetshele ILANGA ukuthi bazifundisa bona ngezimpelasonto.
Kuthiwa nothisha we- Accounting obesekuphela izinyanga ezimbili engabonwa esikoleni usebuyile. Okunye okuvelayo wukuthi isikole kasinaye uthishanhloko oqashwe ngokusemthethweni njengoba kusekhona ibamba emuva kokusula komphathi kulo nyaka.
Okhulumela uMnyango wezeMfundo KwaZulu-Natal, uMnu Scelo Khuzwayo, uthe balusukumele ngokukhulu ukushesha lolu daba ngoba luthinta izimpilo zabafundi.
“Uthisha obefundisa besingeke sikwazi ukumgcina ngoba lezi zifundo zibaluleke kakhulu, yingakho siqashe uthisha obukhali futhi onesipiliyoni, ozokwazi ukuthatha abafundi ababeke kwelinye izinga,” kusho uMnu Khuzwayo. Abafundi bakuqinisekisile ukuthi ufikile uthisha omusha oqale ukufundisa ngoLwesibili futhi bayamncoma kakhulu bathi kabesabi lutho ngaye ngoba usekhombisile ukuthi ubukhali kulezi zifundo.
Induna yendawo, uMnu Zakhele Mthimkhulu, ithi bajabule kakhulu ngokwenziwe yiLANGA lithatha lolu daba liluphuthumisa emnyangweni wezemfundo.
Ithi usethuliwe uthisha kubazali wamukelwa. “Siyabonga kakhulu ngenisenzele khona (
ngoba bese siside kakhulu lesi sikhathi izingane zingafundi silokhu silubika udaba kumhloli, kungenzeki lutho.
"Abazali bese besithathile isinqumo sokukhipha izingane bazifunele izikhala kwezinye izikole ngoba bese kucacile ukuthi kayikho inqubekela phambili,” kusho uMnu Mthimkhulu.
Uthi lesi sikole sebethembele kusona ngoba esinye sasendaweni sifele phambi kwabo ngenxa yakho ukunganakwa kwezikhalazo zomphakathi.