Ubulale ingane "yakhe" wayigqiba
Isithandwa besimphikela
LUPHENDUKE isiqalekiso angasoze asikhohlwa empilweni yakhe usuku lobaba owesifazane waseHammarsdale, entshonalanga yeTheku obeluyizolo ngeSonto ngesikhathi isoka abekipite nalo ligonyuluka ngokushaya libulale ingane yakhe eneminyaka emibili ubudala obesekuphele izinsuku ezintathu idukile.
Umsolwa - onguyise wale ngane angayizali - wehluleke wukulwa no-nembeza wakhe wagonyuluka ku-mngani wakhe ngento ayenzile qede wamthatha wayomkhombisa lapho egqibe khona isidumbu sengane.
Kube wumzuzu onzima emalungeni omndeni ka-Avela Zulu (2) ozalwa nguNkz Nozipho Zulu - obethandana nomsolwa - ngesikhathi isingayise (stepfather) siyokhombisa amaphoyisa lapho sigqibe khona isidumbu sakhe, okuyindawo eqhelile nalapho behlala khona.
Amalunga omphakathi abekhona ngesikhathi umsolwa eyokhombisa amaphoyisa lapho egqibe khona isidumbu, ahlulekile wukuzibamba ngenxa yentukuthelo azama ukuvimba izimoto zamaphoyisa ebeka amatshe phakathi nomgwaqo.
Abefuna ukuba umsolwa adedelwe ukuze ezosina azibethele kuyena. Abecula amaculo ewabhekise kwabesilisa ngesihluku abasenzayo sokubulala abesifazane nezingane. Kuphoqeleke ukuba amaphoyisa asebenzise izinhlamvu zenjoloba ukuhlakaza amalunga omphakathi.
ILANGA lizifikele mathupha endaweni yesigameko lathola ngamalunga omphakathi ukuthi umsolwa ubonakale ngoLwesine emini ephethe ibhakede okusolakala ukuthi ubesifake lapho isidumbu sengane.
Kuthiwa usuke emqashweni wakhe ephethe leli bhakede waqonda endaweni yokucima ukoma wafike wamokloza utshwala ehleli phezu kwalo. Kuthiwa eseqedile ukuphuza, ubonakale eyosithela ngasemafemini ehamba nalo leli bhakede.
Amalunga omphakathi athi kube yisikhashana ehambile, wabuya engasaliphethe ibhakede wabe esehlaba umkhosi etshela amalunga omphakathi ukuthi sekunyamalele indodakazi yakhe, ucela amsize amfunise yona.
Umsolwa ubengasebenzi, bekunguyena ogada izingane zentombi yakhe, okuyilena asolwa ngokuyibulala nenye enezinyanga eziyisi-8 ezalwa nguyena. Amalunga omphathi athi uze wafonela noNkz Zulu esemsebenzini ethi makaphuthume bayobheka ingane ngoba ayitholakali.
Kuthiwa kuze kwagcina ngokuba kuyobikelwa amaphoyisa ngokulahleka kwengane. Afike nezinja eyothungatha umkhondo kodwa lutho ukuyithola.
UNkk Hlengiwe Sibiya, uMaZulu, ongunina omdala ka-Avela, uthi bathole ucingo ngoLwesine ebusuku luphuma kudadewabo (unina wengane) ebazisa ngokulahleka kwengane. Banikele emqashweni kadedewabo bamfica ehleli nomsolwa, okunguyena obebalandisa ngokulahleka kuka-Avela.
“Ngisole ngosuku lokuqala uku- thi unesandla ekulahlekeni kwengane kadadewethu, ngize ngamtshela ukuthi ngisola yena. Size safonela nonina omzalayo simazisa ukuthi sisola indodana yakhe ngengane elahlekile kodwa wayiphikela. Okwenze zaqina izinsolo zami, wukuthi uqambe amanga emaphoyiseni wathi ingane izalwa nguyena,”echaza.
Uthi ngenxa yokuthi bebenganelisekile ngencazelo abayithole kumsolwa, ngoMgqibelo ebusuku ubuyele endlini kadadewabo ehamba namanye amalunga omndeni beyoncenga umsolwa ukuba abatshele ukuthi ingane uyishonisephi.
Bafice umsolwa nonina wengane beqhiyeme embhedeni sengathi kakonakele lutho. Uthi bafike ba-mncenga ukuba akhulume iqiniso kodwa kwanhlanga zimuka nomo-ya.
Kugcine ngokuba abafowabo bambambe bamdedele - bembeka isandla - waze walanyulelwa yisithandwa sakhe, sikhuza abafowabo sithi mabamyeke ngoba bazoze bamlimazele into angayazi.
Eqhuba uNkk Sibiya, uthi umsolwa wehlulekile wukulala ngoMgqibelo esethole isibhaxu sosibali bakhe wavuka ekuseni ngovivi waqonda komunye umngani wakhe wakhona endaweni eyocela ukuhlambuluka lonke iqiniso kuyena.
Kuthiwa ufike watshela umngani wakhe ukuthi ubengaqondile ukuyibulala ingane, ubethi uyayijezisa ngoba ibimbangela isicefe, itetema into engapheli.
Uthathe umngani wakhe wayombomkhombisa lapho esigqibe khona isidumbu sengane. Umngani umyalele ukuba azinikele emaphoyiseni. Umqhubile eyozinikela, zamkhalela.
Okhulumela amaphoyisa KwaZulu-Natal, uCol Thembeka Mbhele, uthi kulindeleke ukuba umsolwa avele enkantolo namhlanje ngecala lokubulala.