Uyavutha uyise wengane ebizwe ngesilima
Uthi uthishanhloko uyamedelela
UYAVEVA owesilisa waseNdabeni, eNgwavuma, enyakatho-mpumalanga yeKwaZulu-Natal ngesenzo sikathishanhloko okuvela ukuthi ubize indodakazi yakhe eneminyaka eyisi-9 ubudala - efunda uGrade 4 - ngesilima ekilasini.
Umbu Sfiso “Thokoza” Mathenjwa, uthukuthele uyaqhuma ngenxa yento athi yenziwe nguNkk Thobile Siyaya onguthishanhloko waseNjakazane Primary School osolwa ngokubiza indodakazi ngesilima.
UNkk Siyaya usolwa ngokuthuka le ntombazane emasontweni amabili edlule. Kubikwa ukuthi ungene ekilasini lalo mfundi eyokhuza umsindo wafike wabuza ukuthi ngobani ababanga umsindo. Ukhombe omunye umfundi ukuba abhale amagama azo zonke izingane ezibanga umsindo, wathi “ungasibhali lesi silima lesi”, esho ekhomba le ntombazanyana.
Mhla ziyisi-5, ILANGA libike kabanzi ngezinkinga ezibikwayo kulesi sikole lapho kunothisha abafake izincwadi zokushintshwelwa kwezinye izikole ngoba bethi ngeke bakubekezelele ukuthakathwa ngabafundi. Kuvele nokuthi kunabafundi abafakelwe ngomunye ushevu babuya esibhedlela.
UMnu Mathenjwa uthi ngeke akuthole ukuphumula enhliziyweni yakhe ngesenzo sikaNkk Siyaya.
“Ngifuna ukumthathela izinyathelo zomthetho ngoba ukhombise ukungedelela. Noma ngabe unenzondo nami kakusho ukuthi sekumele ayedlulisele nasezinganeni zami.
“Akaqali ukuyenza le nto yakhe njengoba nangomunye unyaka wa- yenza le nto. Kulokho ngiphoqelekile ukubakhipha abantwana bami ngibayise kwesinye isikole esiseduze naso lesi,” kusho uMnu Mathenjwa.
Umthombo ongaphakathi esikoleni uthi uNkk Siyaya ubize ingxenye yothisha waya nabo ekilasini wafika wabuza ukuthi yimuphi umfundi obizwe ngesilima, yaphendula indodakazi kaMnu Mathenjwa yathi yiyona ibizwe nguNkk Siyaya.
“Lapho uthishanhloko uvele weswela ngisho umgodi wokucasha ngoba ingane imtshele kwezika- bhoqo ukuthi uyibize ngesilima. Sishubile isimo lapha esikoleni, abanye basikaza ukukhipha izingane zabo bayozicelela kwezinye ezingomakhelwane.
“Badinwa yisenzo sikathishanhloko nesigungu esilawula isikole ngokuthi kabawabizanga amaphoyisa ukuba ayophenya ngoshevu odliwe yizingane. Nalabo thisha abafuna ukuhamba kabamile,” kusho umthombo.
Eziphendulela uNkk Siyaya, uthe kakulona iqiniso ukuthi ubize ingane ngaleli gama futhi yena akazi ukuthi unenzondo noMnu Mathenjwa.
“Mina kangikaze nangolulodwa nje usuku ngibize ingane ngesilima, ngingakwenza kanjani lokho ekubeni ngifundisiwe ngomthetho? Kunokwenzeka ukuba le ngane ifundisiwe ukuthi iqambe amanga nje.
“Ekilasini bengiyobuza kubo bonke abafundi kodwa yangaba nofakazi othi ngiyibize ngesilima. Kwale noma sebeyincenga abanye othisha kodwa yangabe isakhuluma. Mina ngeke nangolulodwa usuku ngibize ingane ngamaganyana ngoba ngifundisiwe ngomthetho.
Nalokhu okushiwo ngubaba uMathenjwa kakulona iqiniso ukuthi mina ngiyamzonda ngakho sengiqhuba impi ngengane yakhe. Uyaxova nje uswele into angayikhuluma kabi ngami.
Uhamba ekhuluma izinto ezingasile uthi ngiyingxenye yabantu abangamfuni bathi uyaloya. Kangihlangani nalezo zinkulumo mina,” kusho uNkk Siyaya.
Okhulumela umnyango wezemfundo KwaZulu-Natal, uMnu Kwazi Mthethwa, uthe kuyichilo ukuthi uthishanhloko angabiza ingane ngegama elifana naleli.