Bavale umgwaqo
Bathi ikhansela lichemile
UVUK’ inj’ ebomvu wavala umgwaqo umphakathi waseGujini, owaseCezwane nowaseMthindlwe, KwaJobe, eJozini, enyakatho-mpumalanga yeKwaZulu-Natal ukhala ngekhansela lakuwadi 4 olisola ngokukhetha iphela emasini uma lithumela izidingo emphakathini.
Umphakathi obuvutha ushaya itoyitoyi ngoMsombuluko, utshele ILANGA ukuthi usuyazisola ngokulahla amavoti awo uvotela uMnu Tholumuzi Zikalala othunywe yiAfrican National Congress (ANC). Uthi ubuvotela uMnu Zikalala okhethweni lwamhla zintathu kuNcwaba (August) nyakenye nje, yingoba ubuzama ukujezisa iNkatha Freedom Party (IFP) ebiphethe phambilini (kule wadi) ngoba yehluleke wukufeza izidingo zawo.
Ezintweni obukhala ngazo, wukuqasha ngokobuqembu okuthiwa kwenziwa nguMnu Zikalala nekomidi lewadi, wukungabikhona kwezakhiwo zomphakathi okungamahholo, yizinkulisa namaprojekthi abesifazane, wukubukela phansi ubuholi bendabuko, wukususwa kwesikhungo sokuqeqeshelwa amakhono okumanje kuthiwa sakhiwa kuwadi 5.
Eziphendulela ngezinsolo ezibhekiswe kuyena uMnu Zikalala, uthe kungamampunge ukuthi uchemile, ubukela phansi ubuholi bendabuko. “Kakulona iqiniso ukuthi ngiqasha ngokuchema. Kwenzekile ngolunye usuku kufike inkampani ezolungisa umgwaqo ngafonelwa ebusuku ukuthumela abantu abazosebenza, nebala ngakwenza lokho. Ngizamile ukuwuchazela umphakathi kwangathi uyezwa, kwaphinde kwaqala phansi ukuvungama,” kusho uMnu Zikalala.
Uhlu lwezikhalo zomphakathi lufundwe nguMnu Jabulani Mthimkhulu lwemukelwa yiMeya yaseJozini, uMnu Delani Mabika. Imeya ithembise ukuzisukumela izikhalo zomphakathi. “Udaba lwenu ngizolusebenza kuleli sonto nabanye ozakwethu. Siyanxusa ukuba abantu bakhuthalele ukuya kumasipala uma kukhona abangakuboni kahle ukuze sizoyigwema imibhikisho enjena.
"Kuyiphutha ukuba ikhansela liqashe ngokwekhadi lenhlangano, lokhu kasikusho kuMnu Zikalala yedwa, sibhekise kuwo wonke umuntu namakhansela aphethe amawadi. Kakufanele ukuba kube nekhansela eligqugquzela umphakathi ukuba ubhikishe ngoba lokhu kuveza isithombe esingesihle ezinganeni ezisakhula.
"Ngicela umphakathi ukhethe abali-10 engizokhipha imoto ukuba ibalande ngizokhuluma nabo ngisebenze lolu daba,” kusho imeya. Kubikwa ukuthi kunekhansela leIFP ebeligqugquzela ukuba kubhikishelwe uMnu Zikalala.