Bahlomise intsha yaseSidumbini
UHLOMISE intsha yaseSidumbini, eNdwedwe, enyakatho yeTheku, wayikhuthaza ukuba ihloniphe abazali bayo futhi izazi lapho ivela khona uMfu Sthembiso Zondo wodumo lwezinkulumo ezakhayo.
UMfu Zondo ubeyisikhulumi sosuku ngosuku lwentsha emcimbini obuhlelwe nguFata David Sithole weCorpus Christi Parish yebandla lamaRoma aKhatholika kule ndawo ngeledlule.
Intsha nabazali bayo bebephume ngobuningi kwaba nemincintiswano yokuxukuza ingqondo, intsha ibuzwa imibuzo ngezimo zempilo. Akapholisanga maseko uMfu Zondo ngesikhathi enikwa ithuba lokukhuluma, ukhumbuze intsha ukuthi umuntu unezigaba ezintathu empilweni yakhe.
Uthe yisigaba sokuba yingane, esokuba musha nesokuba ngumuntu omdala.
“Zonke lezi zigaba kumele umuntu adlule kuzona, angazidoji. Kuyingozi ukudoja isigaba sobusha. Kakumele abantu bahlale begxeka uhulumeni esikhundleni sokuzigxeka bona ngokwehluleka kwabo. Hlonipha lapho uvela khona futhi ungakhohlwa lapho uvela khona,” kubeka uMfu Zondo.
Uthe kumele intsha ithole izibusiso zabazali bayo besaphila ngoba uma seyizifuna sebengasekho, kunzima futhi kuyizindleko.
“Kukhona abathengela izintombi zabo ukudla okuphambili kodwa abazali babo beququdwa yindlala. Abanye bahlala ezindlini eziphambili, bahamba nangezimoto zikanokusho kodwa abazali babo bahamba ngamabhasi, okuyinto embi,” kusho yena.
Wenze isibonelo ngaye, elanda umlando wokuthi uke wahlupheka waze wathathelwa imoto ehluleka wukuyikhokhela kodwa uNkulunkulu wamakhela isu lokuba ayokhuluma emngcwabeni womsakazi othile lapho uLinda Sibiya, owayesebenzela Ukhozi FM, ambona khona wamweza ngelibanzi. “Hlonipha lapho uvela khona, gxila lapho ukhona bese wazi lapho uya khona,” kuphetha uMfu Zondo.
Ikhansela elingaphansi kukaMasipala waseNdwedwe, uMnu Sipho Gwamanda, likhumbuze intsha ngomzabalazo wentsha yangonyaka we-1976 lagcizelela ukuthi nanxa sekuba sengathi umzabalazo wemfundo eNingizimu Afrika wenzeka eSoweto kuphela, naKwaZulu-Natal emalokishini afana naKwaMashu naseLindelani enyakatho yeTheku, yazabalaza intsha.
UMnu Gwamanda uthe bewumasipala bazoqala ukuhambela izikole zakule ndawo bahlomise abafundi ngemikhakha okumele bayilandele uma sebephothule ibanga le-12. knowledge.simelane@ilanganews. co.za
Kukhona abathengela izintombi zabo ukudla okuphambili kodwa...