UKhune ethubeni lokuqopha umlando
Asatholakala amathikithi eCarling Cup
USETHUBENI lokuzifaka emabhukwini omlando u-Itumeleng Khune ongunozinti wokuqina weKaizer Chiefs eqhathwe ne-Orlando Pirates koweCarling Black Label Champions Cup ngoMgqibelo womhla zingama-29 kuNtulikazi (July) eFNB Stadium, eNasrec, eGauteng.
UKhune uzokube egijima umdlalo weBlack Label ihlandla lesithupha nonyaka kulo mqhudelwano osungulwe ngonyaka wezi2011. UKhune ijezi uselenze kwaba ngelakhe kule kilabhu njengoba bencamela ukushiya abanye onozinti kwiChiefs ngenxa yokugqilazwa nguyena. Muva nje uReyaad Pieterse unqume ukujoyina iSuperSport United ecikwa wukudliswa ngamapayipi nguKhune eziMpofaneni.
Lokhu kumenza azitamuzele nesikimu kwiBafana Bafana esilolongwa nguStuart Baxter okholelwa kakhulu kuyena.
Lo nozinti nguyena ohamba phambili ngamavoti esikimini esi- boshelwa ngabalandeli beziMpofana.
Emuva okwamanje kukhona uRamahlwe Mphahlele, u-Eric Mathoho, uLorenzo Gordinho noTsepo Masilela, kanti bamiswe kabi nguDaniel Cardoso, uSibusiso Khumalo noKgotso Moleko.
Esiswini kukhona uGeorge Lebese, uGeorge Maluleka, uWillard Katsande noSiphiwe Tshabalala, kanti bancikwe eduze nguHendrick Ekstein, uWilliam Twala noJoseph Molangoane bese kuthi phambili igadle ngoGustavo Paez noBernard Parker.
UBrighton Mhlongo nguyena osahamba phambili ezintini zeBucs. Emuva abalandeli basabophele uThabo Matlaba, uHappy Jele, u-Ayanda Gcaba noPatrick Phungwayo.
Esiswini kusaboshelwe u-Oupa Manyisa noMpho Makola enkabeni yesisu bese kuba nguThabo Rakhale noThabo Qalinge ezinhlangothini, kanti basengaphandle kwesikimu u-Issa Sarr no-Abbubaker Mobara.
Abagadli abasahamba phambili ngamavoti nguTendai Ndoro noThamsanqa Gabuza, kanti baphefumuliswa ngamapayipi nguThabiso Kutumela no-Ayanda Nkosi.
Amathikithi okubuka lo mdlalo asatholakala eComputicket naseShoprite/Checkers ezweni lonke kanti aphinde atholakale ngokungena ku: www.computicket.com. Awokuhlala kwi-Level 5 abiza u-R70 kuthi aka-Level 1 abize u-R100.
Awokuhlala kwi-Level 2 atholakala ngo-R170. Awezicukuthwane atholakala kwa-SAIL ngokungena ku:www.sail.co.za.