UBongz ulaxaze iMabala Noise
KUSOLWA ukungaboni ngasolinye phakathi kukaDJ Bongz nezikhulu zeMabala Noise Entertainment ayilaxazile.
Izolo ngoLwesithathu lo DJ ogama lakhe langempela nguBongani Dlamini, ubhale kwiTwitter ememezela ukushiya kwakhe kule nkampani.
UBongz ubethathwa njengensika yale nkampani kwazise bekungeyakhe isabizwa ngeMabalabala Entertainment ngaphambi kokuba ithengwe nguMnu Reggie "Governor" Nkabinde.
Ngokuthola kweLANGA, uBongz ulaxaza le nkampani nje, kungenxa yesigameko esenzeke ngempelasonto lapho ebenokungaboni ngasolinye nezinye izikhulu zale nkampani. “Sekunesikhathi uBongz ekhala ngezikhulu ezithile kule nkampani athi zizithwele ukwedlula umnikazi wayo futhi kazibahloniphi abanye abantu.
"Kubuhlungu ukuthi uBongz ayishiye le nkampani njengoba bese kunesikhathi ekuyona futhi unobudlelwano obuhle noReggie oyiphethe,” kusho umthombo osondelene noBongz.
Uthi ukhulumile noBongz ngemuva kwalo mbhalo wakhe enkundleni yezokuxhumana wamtshela ukuthi izinto ezenzeke kule mpelasonto yizona eziholele ekubeni agcine ngokwesula. Umthombo kawufunanga ukwanda ngokwenzekile kodwa uveze ukuthi kunezinto ezenzekile angazithandanga, okuthe uma ezama ukuthola incazelo ngazo, izikhulu ezithile zamthatha zambhekisa entshonalanga.
Kuzokhumbuleka ukuthi uBongz wesula nje, nomculi uZakhele‚ "Zakes Bantwini" Madida usanda kubabela enkundleni yokuxhumana lapho ekhale khona ngempatho ayithole emcimbini wale nkampani obuseGreyville, eThekwini, okuholele ekubeni agcine enganandisanga. UZakes ukhale ngokuthathwa kalula nokungahlonipheki kulo mcimbi obekunandisa kuwona nabaculi baphesheya kwezilwandle.
Imizamo yokuthola uBongz - ogcine ewususile umbhalo wakhe - iphunzile njengoba ucingo lwakhe belukhala luze lube nesibibithwane engalubambi. Okhulumela iMabala Noise, uMhlo Gumede, uthe ngokwabo umsebenzi uyaqhubeka kakukho abazokuphawula ngombhalo kaBongz.
“Akukho esizokusho ngoba uBongz ubhale ekhasini lakhe enkundleni yezokuxhumana ngakho thintani yena. Ngeke siphawule ngeciko elilale lavuka lazibhalela enkundleni yokuxhumana. Uma sekukhona okumele sikuphawule, sizokwenzenjalo ngoba kasesabi ukukhuluma nabezindaba,” kusho uGumede oqale waqophisana nentatheli ngaphambi kokuba aphendule.
UBongz ushiya eMabala nje, izolo kuvukwe ngezithi uPhat Joe obengumsakazi we-East Coast Radio usehlukene nalesi siteshi. Inkontileka yakhe kayivuselelwanga.