Sidide abaningi isigwebo sombhishobhi
EZOMPHAKATHI: Uzochanasa
KUSE ngokunye kuMbhishobhi Jabulani Mvubu (38) enikwa isigwebo esidide abaningi samahora ayizi-7 000 edonsa ejele eNkantolo yamaCala obuGebengu obuHleliwe, eThekwini ngoLwesibili, emuva kokulahlwa ngamacala angama-574 okukhwabanisa.
“Lesi sigwebo engizokunika sona Mvubu, ngisebenzise ubuhlakani obacelwa yiNkosi uSolomoni waseBhayibhelini lapho abesimame ababili babanga ingane inkosi yanquma ukuthi izoyisika phakathi omunye nomunye athole ingxenye yayo kepha owayengunina wangempela wayo wangakuvuma lokho, wayipha lona omunye wesimame,” lawa ngamazwi emantshi, uNkz Christo Mazibuko, yendlalela isigwebo sikaMvubu.
UNkz Mazibuko uqale wabeka ukuthi uzogweba uMvubu ngokobufakazi obethulwe phambi kwakhe nangokwezethulo zommeli kammangalelwa, ezomshushisi, ezikasonhlakahle nojele.
Ukhale ngezethulo zikasonhlakahle, uNkk Nokukhanya Mdletshe, owehluleke wukuphenya ukuthi ngempela uMvubu unalo yini ibhizinisi nezisebenzi ezingama-65 athi uziqashile.
Imantshi iphinde yathi kakucaci ukuthi uhlelo lukaMvubu lusaqhubeka yini noma cha njengoba uma inkantolo ibheka, ibona kusekhona abangabalandeli bakhe nalabo abamphikisayo.
“Kuvele nokuthi iningi lezisulu ngabesifazane kepha usonhlalakahle ukhulume nabesilisa ababili kuphela, akekho noyedwa wesifazane obuziwe ngalolu daba.
"Imkhuzile nokho uMvubu wathi isenzo sakhe kubantu sibe sibi njengoba engumuntu obezibiza ngomholi wezenkolo, enjalo nje, useke walahlwa ngelinye icala elifuze leli.
“Ngikugweba amahora ayizi-7 000 udonsa ejele kusukela ngoLwesihlanu kuya ngoMsombuluko. NgoMsombuluko kuya kuLwesihlanu uzobe ungaphandle usebe- nza imali ozoqala ukuyikhokha lapha enkantolo ngesamba sikaR20 000 kusukela ziyisi-7 kwephezulu. Uzoqala ukukhokhela izisulu ngokohlu lokulandelana kwazo njengoba zingama-280,” kusho imantshi.
Kuthe isiqedile ukukhipha isigwebo nabantu sebephumile, uMvubu etholoza ebhokisini, yaphinde yakhumbula ukuthi kusekhona esinye isigwebo engasikhiphanga secala eliwunombolo 575 lokuzenza ibhange eqoqa imali ngaphandle kwemvume.
Ibe isimgweba u-R10 000 noma abhadle iminyaka emithathu ejele kepha yasilengisa leso sigwebo iminyaka eyisihlanu engatholakali enza icala elifanayo. Abantu baphume enkantolo benokudideka nhlangothi zombili, izisulu nabalandeli bakaMvubu kukhona abathi simfanele lesi sigwebo.
Abanye abalandeli bakhe bebebukeka bekuthokozela ukuthi usazoba ngaphandle.
Umshushisi kuleli cala eselidonse kusukela ngonyaka wezi2014, bekunguNkz Hazel Siraramen, ummeli kaMvubu kungu-Adv Thembinkosi Nene ejutshwe ngabakwaNgubane and Company eMgungundlovu kutolika uMnu Blessing “Killer” Cele.
Funda ILANGA LangeSonto uthole wonke umlando ukusuka nokuhlala kwaleli cala likaMbhishobhi uMvubu. knowledge.simelane@ilanganews. co.za