I-ANC ISOLA ITULO KOLUKAMABUZA
ISOLA itulo lokudicilela phansi isithunzi sikaMnu David Mabuza, i-African National Congress KwaZulu-Natal ngezinsolo zokuthi usekhethe ukuhambisana nohlangothi lukaMnu Cyril Ramaphosa kweso-kwengamela leli.
UMnu Mdumiseni Ntuli okhulumela leli qembu KwaZulu-Natal, utshele ILANGA ukuthi ukumataniswa kukaMnu Mabuza - ongusihlalo we-ANC eMpumalanga - nohlangothi lukaMnu Ramaphosa oyisekela-mengameli le-ANC nezwe, yitulo nje lokungcolisa igama lakhe elisetshenziswa ngabathile ukufeza izinhloso zabo.
“UMnu Mabuza njengosihlalo wesifundazwe, uvumelekile ukuhlangana nabanye abaholi baleli qembu ezinhlakeni ezahlukene kodwa lokho kakuchazi ukuthi usehamba nohlangothi oluthile. Ngikhuluma nje, bonke ozihlalo bezifundazwe bayaba nemihlangano nabanye abaholi.
"Kakusho ukuthi ukuba kule mihlangano sekuchaza okuthile ngohlangothi abahamba nalo,” kusho uMnu Ntuli.
Uncome inqubekela-phambili mayelana nodaba oluthinta ogombelakwezabo abamhlophe. “Kuhle ukuba singagcini ngokubheka indlela esibiza ngayo okuthinta ogombelakwezabo, kodwa sibheke ukuthi senzani ngabo ukuze umnotho usabalale kubona bonke abantu,” kusho uMnu Ntuli.
UMnu Ntuli ubekhuluma emuva kwemibiko esabalele kwabezindaba ethi uMnu Mabuza usehambisana nohlangothi lukaMnu Ramaphosa ngemuva kwemihlangano abenayo esithe nabeseka isekela-mengameli.
Kuzokhumbuleka ukuthi uhlangothi olweseka uDkt Nkosazana Dlamini-Zuma luphakamise uMnu Mabuza ukuba kwesesekela likamengameli we-ANC - njengoba kunengqungquthela yokukhetha ubuholi baleli qembu ngoZibandlela (December) nonyaka.
UMnu Ntuli udalule ukuthi beyi-ANC KwaZulu-Natal, bagculisekile kakhulu ngendlela ingqungquthela yemigomo yaleli qembu eqhubeke ngayo.
“Kuningi ebesikudingida esiphume sivumelana ngakho, okuyinto ekhomba inqubekela phambili.
Kuyathokozisa ukuzwa ukuthi kulokhu esiphume sinemibuzo ngakho kuzobuyela emagatsheni kuyodingidwa ukuze ngoZibandlela engqungqutheleni yokukhetha ubuholi kube sekukuncane okumele sikudingide,” kusho uMnu Ntuli.