KUBEKWE U-R500 000 EMDLALWENI WAMAHHASHI ASE-DUNDEE
AZOKUBE ebanga isiteki sika-R545 000 amahhashi azogadulisana kwiDundee Horse Racing yanonyaka ezokuba ngoMgqibelo ozayo womhla zili-15 kuNtulikazi (July) eDundee ngaphansi kukaMasipala uMzinyathi.
Lo mjaho ngomunye okhula ngesikhulu isivinini eNingizimu Afrika njengoba uhanjelwa ngabantu ababalelwa ngaphezulu kwezi- 20 000 abaphuma kulo lonke elakuleli. Lo mjaho uxhaswe wuMnyango WezeMidlalo wesifundazwe oholwa nguBongi SitholeMoloi kanti ulandela iVodacom Durban July ebingeledlule eGreyville, eThekwini.
Ngaphandle kwamahhashi, kulo mjaho kuba nombukiso wengqephu lapho abenze kahle bethola amathuba okuveza imibukiso yabo. Nonyaka kuthiwa kuzokuba nemijaho eyisi-8 lapho abenze kahle bezohlomula ngemiklomelo yemali nezinkomishi.
Lo mjaho usuke uhanjelwe ngabakwaGold Circle abaphethe amahhashi eNingizimu Afrika. Izihambeli zawo zithola ithuba lokugembula okusuke kubhekwe ngabakwaGold Circle. Okuhlukile ngamahhashi aseDundee wukuthi awakhona ayagabavula kanti eliphula umthetho liyakhishwa. Kuzokube kukhona amahhashi aphuma nangaphandle kwesifundazwe okuhlanganisa iGauteng, iMpumalanga, i-Eastern Cape neFree State naqhamuka eLesotho.