ABAXHASI BAPHOSELWE INSELELO NGEBHOLA LABESIFAZANE
BANXUSWE ukusungula umqhudelwano wabesifazane abaxhasi be-Engen U/17 Knockout Challenge ethulwe ngokusemthethweni ngoLwesibili ekuseni eMoses Mabhida Stadium, eThekwini.
UMazwi Mkhize onguMengameli weSouth African Football Association (Safa) eThekwini ohlangothini lwaseCurries Fountain, usebenzise ithuba alinikiwe ukunxenxa abakwa-Engen ukusungula umqhudelwano ofanayo wabesifazane njengoba iSafa inezinhlelo zokubathuthukisa kuleli.
Kulo mcimbi kuphinde kwamenyezelwa amakilabhu azokube egadulisana kulo mqhudelwano ozoqala ngoLwesihlanu oluzayo lomhla zili-14 usongwe zili-16 kuNtulikazi (July) eMoses Mabhida O/F.
UMkhize uthi kuhlale kuyintokozo ukubona imiqhudelwano efuze lona ngoba isiza kakhulu ukuthuthukisa ibhola entsheni.
Uthi angathanda ukubona nabesifazane beba yingxenye yemiqhudelwano yalolu hlobo.
“Thina njengeSafa singajabula uma singabona namantombazane ebhekelelwa nawo kulo mqhudelwano.
Ngakho-ke ngiyethemba ukuthi aba- kwa-Engen bazokubhekisisa lokhu ukuze nabo (abesifazane) bangasaleli ngaphandle,” kusho uMkhize obanga amandla okuhola iSafa eThekwini no-Alpha Mchunu ohola uhlangothi lwaseHoy Park.
Uphinde wasekela amazwi akhe ngokugcizelela ukuthi njengeSafa, banazo izinhlelo zokuthuthukisa abesifazane kwezemidlalo.
Uthi inselelo ababhekene nayo ngeyabazali abangafuni ukudedela izingane zabo zamantombazane ngenxa yokwesaba.
“Sinazo izinhlelo zokuthuthukisa abesifazane abasebancane kwezemidlalo kodwa inkinga esibhekana nayo ukuthi abazali bayesaba ukudedela izingane ngenxa yobugebengu osebudlangile,” kusho yena.
Amaqembu azodudulana kulo mqhudelwano adidiyelwe kanje:
KwiGroup A:- uMqhele High, Isulabasha, Golden Arrows neDisco.
KwiGroup B ngamaZulu FC, Induna Academy, Brazil Academy neMagabheni Stars. KwiGoup C yiMolweni Warriors, Meadford Sporting, Young Killers neRoyal Eagles. KwiGroup D yiWentworth Lads, Durban FC, Toronto Blizzards neReal Rovers.