Umhlaba kawuphelele bengekho abantu besifazane
EMHLABENI wonke siyazi sisenyangeni la sigubha khona usuku lwabesifazane. Ukuba besilibeka ngolimi lwenkonzo, besiyothi sisemvuselelweni yabesifazane.
Ngabe mhlaba wawungaba yini ukuba babengekho abantu besifazane! Kule ngosi yanamhlanje ake sisike elijikayo nje ukuba sixoxe noma sikhumbuzane ukuthi uyini noma ubaluleke kanjani owesifazane.
Ukuba besinesikhathi esanele besiyoxoxa, sikhumbuzane ukuthi mhlazane kudalwa owesifazane kwalaliswa indoda ukuze kukhishwe ubambo hhayi izimbambo. Masingakubalekeli ukuthi owesifazane uthenjiwe nguNkulunkulu ngokuphefumula komuntu phansi komthunzi welanga.
Singekubalekele ukuthi wonke umuntu njengamanje ofunda iphepha lethu ILANGA kunowesifazane angamkhomba mhlwawumbe noma angeke amkhombe kodwa siyazi ukuthi sivele noma sizalwe ngowesifazane. Singabesifazane kufanele sazi ukuthi sibalulekile noma singatshelwa noma singangatshelwa kodwa iqiniso limile nje lithi “sibalulekile”.
Umuntu wesifazane ubaluleke ekhaya, abaluleke emsebenzini, abaluleke enkonzweni. Uma ufuna ukwazi owesifazane ukuthi ubaluleke kangakanani, ubobuza
thina besilisa ukuthi ukuba emhlabeni owesifazane ubengekho ngabe kunjani nje. Uma ungangizwa kahle, ngicabanga ukuthi nje ungazibuzela umuntu osejele kulo mhlaba akuwona ukuthi zonke izinto zihamba kahle yini njengoba owesifazane engekho.
Singabesifazane masingazithathi kalula futhi singazibukeli phansi ngoba umhlaba kawufudumele futhi kawuphelele uma singekho thina.
Uma uNkulunkulu edala owesifazane, wayedala umsizi ngoba bonke abesilisa emhlabeni kusukela ebunganeni bezalwa baze babe badala, bayohlala bedinga umuntu wesifazane.
Kafushane nje, ngiqonde ukuthi owesifazane ubalulekile kodwa akedluli muntu, singake silinge-ke nje sicabange ukuthi uma sithi owesifazane ubalulekile lokho kusho ukuthi cishe kukhona abangabalulekile.
Uma kungathiwa ake ngichaze lo mugqa ongenhla, bengingathi ukubaluleka kowesifazane kakuchazi ukuthi owesilisa akabalulekile futhi ukubaluleka nobumqoka bowesifazane kakusho ukuthi makahlale phezu kowesilisa.
Ukuthi uyabona noma kawuboni, uyazi noma kawazi, uyathanda noma kawuthandi iqiniso limile nje lithi ikhona indima ekhathulwa ngowesifazane empilweni yethu noma kungathiwa kayibonakali futhi kayinakekile.
Bonke abesifazane kufanele bazi leli qiniso, kudinga umuntu ohlakaniphe kakhulu noma onoNkulunkulu ukubona ukubaluleka kowesifazane.
Sengiphetha; kwabheda, kwadakwa noma kwagwegwa indoda uma nje owesifazane esendaweni yakhe, indlu iyama nezingane zifunde.
Uma kubheda owesifazane, noma indoda ingaqonda kodwa kubhidlika yonke into ngoba ekugcineni kosuku umbuzo omile kuyona yonke indawo, uthi ngabe owesifazane wakuleyo ndawo unjani. Ngisho indoda ingasamukela kamnandi emzini kodwa uma owesifazane ehlinile, sizizwa singemukelekile.
Ngisho umfundisi singamthanda kanjani esontweni kodwa uma umama umfundisi emuncu, kuba muncu lonke isonto.
Ukuba abesifazane bebazi ukuthi banamandla kangakanani, bebengeke benze noma yikanjani futhi bebengeke bavumele abantu babathathe noma yikanjani.
Cishe futhi bebengeke bazijabulise yinoma yikuphi nje ukuba bebazile ukuthi babaluleke futhi bamqoka kangakanani. Kunezindawo othi uma ubona kugcwele abesifazane kuzona, usho enhliziyweni yakho uthi: “lafa izwe” futhi kukhona ezinye izindawo othi uma ufica abesifazane begcwele kuzona, ubuyelwe yithemba lokuthi impilo nekusasa lesizwe lisekhona.
Sibafisela okuhle kodwa abesifazane kule nyanga yabo.
Akekho owesifazane oyisidwedwe, ungavumi ukuhlala nomuntu ongakuhloniphi, ungahlali nomuntu kanti uncengile, ungavumi isisu sibe nguNkulunkulu wakho ngoba siyokwenzisa into ongakaze ucabange ukuthi ungayenza.
Ungayenzi into kanti uyenziswa yindlala. Kubuhlungu mhla ufikelwa yisikhathi sakho sokuba uJehova akuphakamise bese uba namahloni ezinto owazenza mhlazane usephansi, usahlupheka.
Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke.
Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
UPastor Sthembiso Zondo ngumeluleki nomethuli wezinkulumo ezakhayo.
Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292.
Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034