IQHINGA LOKUBUMBA I-KZN EBHOLENI
KUBUNJWA iqhinga lokuthi iKwaZulu-Natal ihube ingoma eyodwa njengoba kubhekwe okhethweni lweSouth African Football Association (Safa) ngonyaka ozayo.
ILANGA lilumane indlebe nabaholi abehlukene beSafa esifundazweni bakuqinisekisa ukuthi omengameli namalungu amele isifundazwe esigungwini sikazwelonke bazokuba nomhlangano ngoMgqibelo eMtubatuba, enyakatho mpumalanga yesifundazwe.
Kulo mhlangano kubhekwe ukuthi kubhungwe ngokutshalwa kwabaholi ezikhundleni ukugwema ukuqubuka kwemibango nokuklayeka kwesifundazwe esijwayele ukuqhekezwa ngabantu bangaphandle.
Kulindeleke ukuba kubhungwe ngokuthi ngubani okulungele ukuba nguSihlalo ngokunjalo nesekela esifundazweni.
Kubhekeke nokuthi kulo mhlangano kunkankanywe amagama abaholi abazokhankaselwa yisifundazwe ukungena ebuholini bukazwelonke.
Ukubumbana kweKwaZulu-Natal kungenza kube yiyona okukhala isicathulo sayo ngobuholi bukazwelonke njengoba inezifunda eziningi kunezinye izifundazwe.
Nokho-ke kungenzeka kube nezinkinga njengoba kusengenzeka kufike ukhetho lukazwelonke abanye omengameli bezifunda sebekhishiwe ezifundeni zabo njengoba kumele zikhethe ngoNhlolanja (February).
Ukhetho lukazwelonke lukhonjwa kuMandulo (September) onyakeni ozayo njengoba kuthiwa kumele lusingathwe ngemuva kweNdebe yoMhlaba ezokuba seRussia. Lolu khetho bekumele lube kulo nyaka kodwa lwahlehliswa.