Ingcindezi koweChiefs ngeMTN8
Umdlalo weSuperSport ungamdalela amazinyo abushelelezi
UNUKELWA yincwadi yesexwayiso uSteve “Mphathi” Komphela ongumqeqeshi weKaizer Chiefs enomdlalo onzima neSuperSport United weQuarter Final yeMTN8 ezokuba ngoMgqibelo ngo-20h15 eMoses Mabhida Stadium, eThekwini.
ILANGA lihabule ukuthi uKomphela uyalwe yizikhulu zale kilabhu ukuqinisekisa ukuthi uyawunqoba lo mqhudelwano ocebe kunayo yonke egijinyelwa kwiPremier Soccer League (PSL). Izingqwele zalo mqhudelwano zizuza u-R8 million emuva kwemidlalo emine nje vo.
Lo mqhudelwano uthathwa njengomkhulu ebholeni laseNingizimu Afrika njengoba kuwona kuqhathwa izinkunzi ezisonge isizini edlule zikwi-top 8. Kusuke kungowokuvula isizini entsha. Umdlalo weChiefs neSuperSport kubhekwe ukuba uhehe izinkumbi zabalandeli njengoba kwaziwa ukuthi iChiefs iyathandwa KwaZulu-Natal.
Leli phephandaba lithole ngesinye sezikhulu zale kilabhu ukuthi uKomphela uyalelwe ukuba awunqobe kumnyama kubomvu lo mdlalo. Kuzokhumbuleka ukuthi lo mqeqeshi selokhu ejoyine le kilabhu kumasizini amabili edlule akakaze ayinqobele inkomishi kwiPSL.
Leli phephandaba lithole ukuthi uma engase akhishwe zisuka nje kulo mqhudelwano angase asayiniswe incwadi yesexwayiso okuyiyona ezophoqa ukuthi axoshwe uma kuwukuthi ikilabhu iyaqhubeka nokuthola imiphumela engagculisi. Naye lo mqeqeshi uzisholo ngowakhe ukuthi lo mqhudelwano unengcindezi kodwa wathi amalungiselelo uwenze ngokweqophelo eliphezulu.
“Konke kumi ngomumo, inkinga nje wukuthi nabantu esizodlala nabo kwabona bazilungiselele. Ngeke ngikuphike ukuthi lo mqhudelwano uza nengcindezi, kufanele noma kanjani siwunqobe. Sibe nezinkinga eziningi ngesizini edlule kodwa esishaye kakhulu ngeyokushweba amathuba ebesiwathola.
“Leyo nto isenzele phansi. Kodwa-ke sizamile ukukulungisa lokhu kanjalo namaphutha nje amanye ebesiwenza. Ngikholwa wukuthi siwulungele lo mdlalo kayikho into engingakhala ngayo,” kusho uKomphela.
U-Eric Tinkler ocija iSuperSport, uthi konke kuhamba ngokohlelo.
“Lo mqhudelwano umqoka futhi abafana bami bawulangazelele ngendlela eyisimanga. Kuyisifiso sami ukuthi ngibingelele ngenkomishi njengoba ngifika nje ekilabhini. Siyakwazi esikulindele kwiChiefs, ngikholwa wukuthi kayazi lutho ngathi okuzoyenza ithwale kanzima.
“Kulo mdlalo sizokube sihluke kancane kunangesizini edlule, kunoshintsho engizolwenza. Kunabadlali abasha abangase babonakale kanti kunabafana abancane okungenzeka ngibanike ithuba ngoba bakhombisa isibindi. Ngithembisa umdlalo oseqophelweni eliphezulu noma kanjani sizoyinika umdlalo onzima iChiefs,” kusho uTinkler.
Amathikithi alo mdlalo kubikwa ukuthi ahamba okwamakhekhe ashisayo kanti abiza uR60 awabadala kuthi awezingane atholakale ngo-R20. Kulindeleke ukuba kushaye usuku lomdlalo esephele wonke ngokusho kwabaxhasi.
Seyiyonke imidlalo yamaQuarter Final eMTN8 imi kanjena:KUSASA NGOLWESIHLANU EBidvest Stadium: Bidvest Wits vs Golden Arrows 20h00 (SS4). NGOMGQIBELO ECape Town Stadium: Cape Town City vs Polokwane City 15h00 (SS4 nakwiSABC1).
EMoses Mabhida Stadium: Kaizer Chiefs vs SuperSport United 20h15 (SS4 nakwiSABC1). NGESONTO ELucas Moripe Stadium: Mamelodi Sundowns vs Maritzburg United 15h00 (SS4 nakwiSABC1).