MAKUNGAKHULUNYWA ILUMBO EMAPHEPHENI NGEDUMBE
MHLELI: Kwelakho esilifunda mihla namalanga, ngicela ungiphe isikhala ngoba nginemibuzo eminingi mayelana nenkulumo yeMeya yaseDumbe ephume kwelakho mhla zingama-31 kuNtulikazi (July) - 2 kuNcwaba (August) engicabanga ukuthi sibaningi esishiye sididekile.
Umgwaqo ozohlanganisa iDumbe noPhongolo, owuP271, ethi imeya bakwazile ukuwakha wadla isabelomali sika-R1. 2 billion, kuwukubhixa umphakathi ngodaka emehlweni ngoba kawukaze uqalwe. Makasho phela uku- thi wakhiwa iyiphi inkampani, sikuphi thina mphakathi ngaleso sikhathi.
Umgwaqo ohlanganisa iPhuzane naseMahloni athi udle isabelomali sika-R230 million futhi usuphelile ukufakwa itiyela cha nalapho sichathwa simile ngoba ulubhuqu, ngaphandle uma wakhiwe ngotikoloshe ebusuku silele kwasa usuphelile.
Esikwaziyo thina bendawo yibhuluho eliwela phezu kwedamu uBivane endabeni, ekagesi iyasidida ikakhulukazi endaweni yaseNkembeni uma ethi kumanje uyafakwa ekubeni kusamiswe izigxobo maqede yakhala ngebhajethi yona imeya.
Makungadlalwa ngabantu emaphepheni kukhulunywe ilumbo kube sengathi iDumbe iyathuthuka kanti sidlala abaholi be-ANC bekhohlisa umphakathi nesizwe sonke.
Ngokuthatha nje uMasipala waseDumbe mhla zintathu kuNcwaba wezi2016 ngabe senisebenze umsebenzi ongaka! Cha niyasebenza bo.