Kubhuntshe imidlalo bengabonwa onondweba
Kusale usuku lomshado belotsholwa ngo-7-0
UKUNGAFIKI konondweba kubhuntshise imidlalo emibili yeSouth African Football Association (Safa) KwaZulu-Natal ABC Motsepe League obekufanele igijinywe ngempelasonto ezinkundleni ezahlukene.
ILANGA lithole ukuthi kawubanga khona umdlalo phakathi kweSummerfield Dynamos noMvoti FC obekumele ugijinywe ngoMgqibelo eChatsworth Stadium, eThekwini, kanjalo noweMaritzburg City neKwaMashu All Stars obuhlelelwe ukuba seWadley Stadium, eMgungundlovu. Yomibili le midlalo kayidlalwanga ngenxa yokungafiki konondweba abebejutshwe ukuyiphatha.
Kuthiwa empeleni bafikile onondweba eChatsworth Stadium kodwa bengenabo ubufakazi bokuthi bajutshwe ukuzowudlalisa kanti eMgungundlovu kuthiwa kabafikanga nhlobo.
UNkemelle Ntsoane oyisikhulu seKwaMashu ukhale ngezindleko abangene kuzona belungiselela lo mdlalo ogcine ungagijinywanga. Uthi okucasula nakakhulu wukuthi iSafa kayibakhokheli imali yezindleko ngesikhathi okwenza bagcine sebedonsa kanzima kwezomnotho.
UBonginhlanhla Gwala ongumnikazi woMvoti FC, uthi kubi kakhulu ukufika enkundleni uphinde ungadlali ekubeni ungene ezindlekweni ezinkulu. Uthi isimo esinjena kumele iSafa izame ngazo zonke izindlela ukusigwema kwazise ishaya emaphakatheni ezikhulu zamakilabhu, inyomfa izinhlelo zabaqeqeshi kanti nabadlali bayaphazamiseka ukujimela ubala.
UKwenzakwakhe Ngwenya oyisikhulu seSafa esibhekene nezemiqhudelwano kulesi sifundazwe, ukubeke kwacaca ukuthi uzokhuluma nehhovisi likazwelonke ukulungisa lesi simo. Uthi isixazululo kubukeka kuzokuba wukunikwa kwesifundazwe amandla okuziqokela onondweba abazodlalisa imidlalo yalesi sigaba.
Nakuba kube nobuhixihixi kule midlalo emibili, eminye iqhubeke ngaphandle kwezihibe njengoba iMilford FC ishayelwe ekhaya yiHappy Wanderers ngo-2-1 eRichards Bay. Amagoli enqobe ngawo iWanderers womabili abekwe enethini nguMxolisi “Gee” Mazibuko. I-GWP Friends iqumbe phansi iKwaDukuza United ngo-10 wegoli likaLindani “Lira” Buthelezi oke wagijima kwiLamontville Golden Arrows nakwiThanda Royal Zulu ngokwahlukana.
I-Ashley United ishaywe yiLadysmith United ngo-2-1 ngoMgqibelo eSugar Ray Xulu Stadium, eClermont. Amagoli enqobe ngawo iLadysmith abekwe enethini nguZolani Daki no-Andiswa “Ping Ping” Dlamini.
INatal United ilobole iSes’khona FC ngo-7-0 ngoMgqibelo eSugar Ray Xulu. Amagoli ezikaSenzo Sokhela eze noSandile “Kia” Dlamini amathathu, uSandile “Shoti” Mthembu, uKefiloe “Siki” Buthelezi, uSandile “Sedjio” Mkhwanazi noSphamandla “Malenda” Mtambo.
Umdlalo weDurban FC neEdendale Juventus kawubanga khona. Kuthiwa iDurban FC beyihlelelwe ukuyodlala i-Engen Tournament eGoli.
Isiyonke imiphumela yemidlalo yeSafa KZN ABC Motsepe League imi kanje: Milford 1, Happy Wanderers 2; GWP 1, KwaDukuza 0; Ashley 1, Ladysmith United 2; Ses’khona FC 0, Natal United 7.