UTAU USEKULUNGELE UKUSHIYA I-SUNDOWNS
UZIBONA esekulungele ukushiya iMamelodi Sundowns ayogijima emakilabhini ase-Europe uPercy Tau ongumdlali osemncane wale kilabhu ophinde agijime naseqenjini lesizwe lakuleli iBafana Bafana.
IBafana ijabulise abathandi bebhola bakuleli ibhudluza iBurkina Faso ngo-3-1 kowokuhlungela iNdebe yoMhlaba ngoMgqibelo ntambama eFNB Stadium, eGoli. Amagoli eBafana abekwe enethini nguTau, uThemba Zwane noSibusiso “Villa” Vilakazi, kwathi eleBurkina Faso lashaywa ngu-Alian Traore kwi- free-kick.
IBafana iqede lo mdlalo ingasaphelele kukhishwa ngekhadi elibomvu uBongani “Ben 10” Zungu.
UTau oqokwe njengomdlali ovelele kulo mdlalo, uthi uzizwa esekulungele ukuyodlala e-Europe.
“Ngicabanga ukuthi yisona sikhathi-ke manje lesi sokuthi ngihambe ngiyodlala e-Europe. Yilapho kufanele ngikhulele khona ukuze ngithuthukise nezinga lomdlalo wami. Kuyiphupho lanoma yimuphi umdlali ukugijima e-Europe, nami nginalo leli phupho futhi ngifisa lenzeke manje, yisona isikhathi lesi,” kusho uTau.
Ephawula ngomdlalo uthe: “Sibe nomdlalo omuhle, konke kwenzeke ngendlela ebesihlele ngayo. Besihlangene, yonke into ivune thina kulo mdlalo kangikhali ngalutho. Ngabe sihlohle inqwaba yamagoli kunalokhu wukuthi bese sizethemba ngokweqile sagcina sesimosha amathuba.”