Zimkhalele umfundi "odlwengulile"
Bebesebhasini behambe nesikole
KUSABATSHAZWA ihlazo lomfundi waseQalakahle High School, eBhamshela, enyakatho yeTheku, osolwa ngokudlwengula uzakwabo kade kuhanjwe nesikole mhla zingama-20 kwephezulu, kuzongcebelekwa eThekwini.
Kuthiwa lo mkhuba uwugile ebhasini abebehamba ngalo phambi kwabanye abafundi, sekubuyelwa emuva.
Umthombo weLANGA ulihlebele ukuthi umfundi odlwenguliwe ubengazi nanyaka njengoba kusolwa ukuthi kukhona abefakelwe khona esiphuzweni sakhe. Kuthiwa esebanjiwe umsolwa, ushaye uthisha obezama ukumkhuza ngesikhathi egila lo mkhuba.
"Kuthiwa umsolwa uqale watshela umshayeli webhasi ukuba acishe amalambu. Umshayeli ukwenzile lokho, kuthe sekucishiwe wabe esedlwengula uzakwabo. Nakhona ukuze abanjwe, kusize omunye umfundi obonile watshela umshayeli, kwaziswa nothisha abebekhona ebhasini. Umshayeli ukhanyise amalambu wabanjwa umsolwa,” kusho umthombo.
Uthi umfundi odlwenguliwe uphuthunyiswe esibhedlela esesimeni esibucayi. Zimkhalele umsolwa ngoLwesihlanu olwedlule.
Okhulumela amaphoyisa KwaZuluNatal, uCapt Nqobile Gwala, usiqinisekisile lesi sigameko wathi amaphoyisa aseNsuze aphenya icala lokudlwengula kanti ukhona umsolwa oboshiwe. Uthe umsolwa ubanjwe kubo eChibini kanti kulindeleke ukuba avele eNkantolo yeMantshi yaKwaMaphumulo namuhla ngoMsombuluko.