IHLABANE NGOKHONKOLO WOMDLALI I-MILFORD

Ilanga - - Ezemidlalo - MFANAFUTHI NDLOVU

IHLABANE ngokhonkolo wesitobha iMilford FC egijima kwiSouth African Football Association (Safa) KwaZulu-Natal ABC Motsepe League.

ILANGA lithole ukuthi iMilford isayinise uSboniso “Jomo” Gumede wodumo kwiPlatinum Stars nakumaZulu FC. IMilford ibhudluze iGWP Friends ngo-3-0 ovuthayo koweligi ngoMgqibelo ntambama eMhlathuze Sports Complex, eRichards Bay.

Amagoli enqobe ngawo abekwe enethini nguXolani “Madoda” Mpontshane namabili kaZeluleko “Matupha” Mthethwa obeyiphela endlebeni kubadlali beFriends. Lo mphumela wenze waba nesiqalo esihle uPhilani “Slwane” Mkhize osanda kuqashwa njengomqeqeshi omusha kule kilabhu.

UDkt Xanti Pupuma ongumnikazi weMilford, utshele ILANGA izolo ngeSonto ukuthi weneme kakhulu ngokuthola uGumede amchaze njengofish’ omkhulu. Uthi unelikhulu ithemba lokuthi uzokwazi ukusiza abadlali abancane bale kilabhu.

“Sivumelane noGumede ngokuthi sizomdedela uma kukhona ikilabhu eqhamuka kwiPremier Soccer League emdi- ngayo,” kusho uPupuma osanda kuqeda konke noThobeka Gumede osuka kwiThanda Lions, uLungani Zikhali wasendaweni, uSiyanda Cele obegijima kwiSharks Academy noTumelo Tsoanyane obekwiDurban FC ngesizini edlule.

Kuzo ezeMotsepe League, iDurban FC ishaye uMvoti FC ngo-2-1 koweligi ngoMgqibelo eSugar Ray Xulu Stadium, eClermont. Amagoli ezikaMlungisi “Prof” Ngubane womabili ashaywe nguBonga Ngcobo kwathi eloMvoti FC leza noSandile “Villa” Khoza.

INatal United ishaye iHappy Wanderers ngo-3-1 koweligi ngoMgqibelo oGwini Sports Complex. Amagoli eNatal abekwe enethini nguSandile “Kea” Dlamini, uSandile “Shoti” Mthembu noSandile “Sergio” Mkhwanazi kwathi elokubika leWanderers leza noThuso Mbhele.

Isiyonke imiphumela yemidlalo yeSafa KZN ABC Motsepe League imi kanje:Ladysmith 1, Summerfield 1; Drakensburg FC 0, Pmb City 1; KwaDukuza 2, Ses’khona 0; Milford FC 3, GWP 0; Wanderers 1, Natal 3; KwaMashu 0, Juventus 1; Dbn FC 2, uMvoti FC 1.

Newspapers in Zulu

Newspapers from South Africa

© PressReader. All rights reserved.