UKOMPHELA UKHALA NGOPULE EKSTEIN

Ilanga - - Ezemidlalo - SENZO SOKHELA

UMQEQESHI weKaizer Chiefs uSteve “Mphathi” Komphela uzwakalise ukungenami ngoHendrick “Pule” Ekstein oyisikhwishikhwishi sale kilabhu enenebule AmaZulu FC ngo-3-0 emdlalweni wesigaba sikaLast 16 kwiTelkom Knockout ngoMgqibelo ebusuku eMoses Mabhida Stadium, eThekwini.

Amagoli okunqobe ngawo iChiefs abhajiswe ezintanjeni nguGeorge Maluleka ngomzuzu wama-33, u-Ekstein ngowama-55 noSiphiwe “Shabba” Tshabalala ngowama-59.

IChiefs bekuvele kulindelekile ukuthi iwunqobe lo mdlalo kwazise uKomphela ubethola izinsongo zokusocongwa ngaphambi kwawo. Bekuthiwa uma nje eke wehlulwa ngeke aphume kule nkundla.

UKomphela ujabulise okwengane inikwa amaswindi enqoba lo mdlalo. Nokho uzwakalise ukungenami ngo-Ekstein njengoba emsola ngokubuye azithele ngabandayo.

“U-Ekstein angaba ngumdlali oseqophelweni eliphezulu wukuthi kunento engihlale ngimyala ngayo ukuba ayilungise kodwa akakayilungisi namanje.

"Ngeke ngikwazi ukuyidalula ngoba ngizokube ngimuqhatha nezitha. Naye uyazi ngisho abalingani bakhe bahlale bemutalabha ngaleyo nto.

“Uma engalungisa leyo nto kangingabazi ukuthi angaba ngumdlali oseqophelweni eliphezulu. Indlela adlala ngayo ubuye angidide kwamina, uyashesha ukucabanga, inkinga yakhe nje wukuthi ubuye acwile kanti kweminye imidlalo ubuye ehlise ifomu. Kodwa ngokuhamba kwesikhathi uzokuba yile nto engiyifunayo,” kusho uKomphela.

Uthi indlela abawuvule ngayo lo mqhudelwano isibafake umfutho wokuthi bazoyinqoba le nkomishi.

“Kasizange sigwaze ibhece kumaZulu, nawo adlalile futhi abeyingozi. Kodwa-ke ukunqoba kwethu kukhuphule umfutho wokuthi siyinqobe lo nkomishi.

"Kuyisifiso sami ukuthi le kilabhu iwine izinkomishi nsuku zonke ngikhona noma ngingasekho,” kusho uKomphela.

IChiefs izogadulisana nePolokwane City kowe-Absa Premiership kusasa ngoLwesibili ngo- 19h30 ePeter Mokaba Stadium, ePolokwane. UKomphela uthi uzokuba nzima lo mdlalo.

“Ngihlalele ethembeni lokuthi kufike lo mdlalo amamasela abadlali bami esephumule ngokwanele ngoba siyogijima laphayana, iPolokwane kayidlali iyagijimisana.

"Kodwa-ke sizokuya kulo mdlalo siwuhlomele njengayo yonke futhi sizokuqinisekisa ukuthi siyawunqoba,” kusho uKomphela.

Newspapers in Zulu

Newspapers from South Africa

© PressReader. All rights reserved.