INSIMANGO
INSIMANGO wuhlobo oluthile lwesilwane esisamuntu esikhona ngokwemvelo eNingizimu Afrika. NgesiNgisi ibizwa ngeSykes’monkey noma yiBlue monkey. Ngokwesayensi kuthiwa yiCercopithecus albogularis. Iqanjwe ngomcwaningi wezemvelo oyiNgisi, uCol William Henry Sykes, owaphila ngowe-1790-1872. Nokhoke ngokwabacwaningi, ziningi izinhlobo emndenini walesi silwane kodwa thina esivele sikubize ngegama elilodwa nje elithi yinkawu.
ITHOLAKALA KUPHI?
Ikhona engxenyeni ye-Afrika emaphakathi, e-Ethiopia, eNingizimu Afrika nasengizimu-mpumalanga yeDemocratic Republic of Congo (DRC). ENingizimu Afrika insimango ithanda ukuhlala emahlathini.
Kunezinhlobo ezimbili kuphela zensimango eNingizimu Afrika futhi zisengcupheni ngenxa yokuncipha kwendawo yazo yemvelo ngokuphazanyiswa ngabantu.
ISIMO NOKUBUKEKA KWAYO
Ngokuvamile ikhonde likhulu kunomathananazana ngoba lona liba li-11kg isisindo kanti umathananazana uba yisi-8kg. Imizimba lena yelulekile yasho ngoholokoqo lomsila ongangomzimba, kweve ngengxenye eyodwa kwezintathu ngaphezulu komzimba. Isho ngombala ompunga, ubuso lobu bumnyama bhuqe.
Ubuso, yizandla nezinyawo kakunaboya futhi kunombala omnyama. Izitho zangasese zekhonde zinemibala egqamile, amasende afana nesibhakabhaka ngokuphaphathekile kuthi ugqubu lube bomvu.
Insimango isho ngemikhono nemilenze okuthi makulingane ngobude. Isijwana (umntwana) sinombala ozothile nobuso obubukhwebezane. Umathananazana unamabele amabili esifubeni njengomuntu.
IMIKHUBA YEMPILO YENSIMANGO
Izinsimango ziphila emphakathini lapho kuba nekhonde eliyingqwele elinesigodlo somathananazana nezinye ezisakhula okwenza zibe wumhlambi ongaze ufinyelele ema-50.
Kulo mhlambi kuba namaduna angahlobene njengoba uma esakhula aye awushiye umhlambi azalelwe kuwona uma esengena esigabeni sokuthomba.
Kuthiwa ikhonde libanga umsindo omkhulu okucatshangwa ukuthi ngowokuqhelisa amanye amakhonde ukuba angasondeli kulowo mhlambi eliwuholayo.
Ngobuso, ikakhulukazi ngokunyakazisa amehlo, okuhambisana nokumisa umzimba ngendlela ethile njengokukhokhoba, wukuma phuhle nokubuka igqolozele, iyakwazi ukudlulisa umyalezo wentukuthelo noma wokwesabisa.
Ngokuvamile ukuxhumana ekwenzayo kuyizigaba ezintathu: wukubiza, yimpi noma ukwethuka. Umsindo osakuhahaza usuke wenziwa wumathananazana ubiza izijwana zawo. Ukuklabalasa kusho ingozi noma ukukhathazeka noma ukuba sezinkingeni njengokuba khona kwesitha eduzane, nalapho umsindo uyehluka ngokohlobo lwesitha esibonwa yinsimango. Kuthiwa nxa ibone ingwe, yenza umsindo oyizikhawu ezimfushane ezithi zingawuzwa ezinye zinombele esihlahleni ngokushesha.
Uma ibona ukhozi, yenza umsindo ophansi osakugwavuma, bese ezinye zibheka phezulu esibhakabhakeni ukubona ukuthi isitha sikuphi. Nxa ibona inyoka, yenza umsindo ochwaza ngokunswininiza bese ezinye zicinga phansi ukuthi ingakuphi.
Okunye ukuxhumana kwenzeka phakathi kwamaduna wodwa lapho ingqwele ivezela amanye amaduna ubungako bogqubu nokumisa umsila noboya obumhlophe ngaphambili.
Leyo-ke ethobayo yehlela ngezansi, iyaye ikhombise ngokukhokhoba yenze umsindo wakhona oqondene nalokho. Uma ihamba isebenzisa imilenze nemikhono ngokufanayo phansi naphezulu esihlahleni.
Iyakuthanda futhi ukusuka egatsheni lesihlahla igxumele kwelinye. Yehla esihlahleni ikhanda libheke phansi. Kuthiwa ofeleba laba bayakwazi ukubhukuda. Esinye isikhathi basichitha bechobana, okwenza kuqine amaxhama obuhlobo.
IDLANI?
Insimango idla kokubili okumilayo nenyama kodwa ithanda izithelo ezinamanzi, amaqabunga, yinhlaka, yizimbewu, amantongomane, amakhowe na
majikijolo. Kuyenzeka futhi idle izinambuzane, amaqanda ezinyoni, yizinyoni, yizibankwa, amagundane nezinye izilwanyana ezinamathambo.
Izinambuzane namagundane ivamise ukuba ikudle uma kwenzekile kwasha indawo ehlala kuyona bese kuntuleka ukudla kwayo okumilayo. Lapho kulinywe khona, insimango kuyenzeka ibe wuhlupho ngokulimaza isivuno.
UKUZALANA KWAZO
Insimango izala ngesikhathi esithile sonyaka, okuvame ukuba ngesikhathi sezimvula nokufudumala kuya ngokwendawo ezitholakala kuyona kodwa kuvame ukuba phakathi kukaMbasa (April) noNhlangulana (June) bese abantwana bezalwa emuva kwezimvula lapho kunenala yokudla.
Uma isingena esigabeni sokuthomba, insimango yeduna iya komunye umhlambi, imvamisa ihambisana nenye yomhlambi ezizalwa nayo kuwona. Izinsikazi zona kaziwushiyi umhlambi ezizalelwe kuwona. Insikazi ilungela ukuzala uma isineminyaka emine ubudala.
Nokho kuthiwa efuyiwe iyashesha ngangoba ingazala ngisho iseneminyaka emibili. Iduna lona lilungela ukuzalisa uma selineminyaka eyisihlanu. Insikazi ekhweliwe imitha izinsuku ezili163-165 bese izala isijwana esisodwa.
UBUDLELWANO NABANTU
Phambilini osiyazi basemadolobheni amakhulu kwake kwaba yimfashini ukubiza umfana wasemakhaya ngensimango, okungasho khona ukuthi usuke eyisiwula kodwa okusho ukuthi izinto zasezweni akazazi. Uma sekuza kumangalise usuthola ukuthi yena lowo mfana obebizwa ngensimango yilabo ngqeqe basemadolobheni, sekunguyena obahlaba umxhwele othisha ngokwenza kahle umsebenzi wesikole.
Abaqophi bemvunulo benza elekhethelo ibheshu ngesikhumba sensimango. Abanye bayayidla. Abacwaningi besayensi bayayisebenzisa insimango ukuthola ulwazi oluthile, imvamisa lwezokwelapha, kusukela ngeminyaka yowe-1950. Insimango lena ibambe iqhaza elimqoka kwezemvelo ngoba isiza ekusakazeni imbewu yalokho ekudlayo.
Isibonelo, eRichards Bay, ogwini oluseyakatho yeKwaZulu Natal, kuthiwa izinsimango zasiza kakhulu ekuqinisekiseni ukuthi izimila zemvelo ziyavuseleleka lapho beziphazamiseke khona ngenxa yemisebenzi eyenziwa ngabantu.