ISilo siyaveva ngolweNgonyama Trust
Uhulumeni ufuna ukuqeda ngayo
KUZOJUTSHWA ithimba labakhongi elizobhekana nemizamo yokuqedwa kweNgonyama Trust, njengoba ziqina izinkulumo zokuthi kumele kuphele ngayo.
ISilo, uZwelithini kaBhekuzulu, besihlangene namakhosi aKwaZulu-Natal ngoMsombuluko oNdini kubhungwa lolu daba.
Sithi abakhongi bazoqinisekisa ukuthi baxhumana nazo zonke izinhlaka zomphakathi bawazise ngalolu daba. Siveze ukuthi sizoxhumana namaqembu ezepolitiki ngaphambi kokhetho, siwazise ukuthi kuzoyiwa okhethweni sesazisiwe isizwe samaZulu ukuthi uhulumeni ufuna ukuthatha umhlaba waso.
“Kuyangijabulisa ukuthi amaqembu amaningi ezepolitiki ayangeseka kulokhu, kodwa-ke kangifuni nawo angene ngenxeba. Lolu daba seluphendulwe ipoliti- ki, ikakhulukazi eyomnotho ngoba akekho ongaliconseli amathe izwe likaZulu. Uhulumeni ngifuna ungitshele ukuthi uqondeni ngale nto. Ngikhuluma nje kunamapulazi athengwe wuhulumeni kodwa angasetshenziswa, okuyizinto ezimqoka lezo.
“Umhlaba uwumphefumulo kuthina, umuntu othi masiphucwe wona uchaza ukuthi masife. Ngeke ngivume futhi ngiyavevezela uma ngikhuluma ngalolu daba. Lo mhlaba ngowethu, kakusiyona ipolitiki lena! Ngiyabona sebesuthi kakhulu yimali yokwebiwa,” kusho iSilo.
Amakhosi atshele iSilo ngezinqumo asezithathile ngalolu daba. Athi abuhlungu kakhulu ngokuthi umhlaba wawo kumele ungene ngaphansi kukahulumeni. Aveze ukuthi ayazichitha izincomo zombiko obhalwe yithimba ebeliholwa nguMnu Kgalema Motlanthe, oke waba yisekela likamengameli, elibizwa nge- high level panel ngoba kazinaso isisekelo. Athi kakukaze kuhlalwe nawo atshelwe ngaphambi kokuba kuthathwe isinqumo esifana nalesi - neSilo imbala kakukaze kuhlalwe naso.
Agcizelele nokuthi ngeke kufikwe esiphethweni lingakaze liye kuwona leli thimba liyochaza ngalo mbiko. Amakhosi athi umbhali walo mbiko uyisitha esidala som- lando wakwaZulu, kakukho okuhle akuvezayo.
ISilo sitshele amakhosi ukuthi ngenyanga ezayo mawabuyele kusona nezinduna zawo ezisemthethweni, sifuna kuqiniswe amaxhama ukuze impi yokuvikela umhlaba ibe wukhonkolo.
UNdunankulu Willies Mchunu uthi uhulumeni waKwaZulu-Natal kawaziswanga ngaleli thimba elikhiphe lo mbiko. Uthi sebejube ithimba labo ukuba lithole kabanzi ngokuholele kulesi sivumelwano. Umbiko uveze ukuthi i- high level panel ixoxe nezinkulungwane zabantu eJozini, yathola ukuthi umphakathi kawenelisekile ngeNgonyama Trust.
Lithe abantu bathe uma kuthunyelwa intuthuko emphakathini, kabathintwa bese imivuzo yakhona ithathwa yiNgonyama Trust.
* Bheka ekhasini 19