Ungaphenduki isicefe kozakwenu ngenxa yokuhala
INDABA yokudla iseyinkinga emsebenzini, ikakhulukazi uma indawo yokusebenza ivulekile ( open plan) izisebenzi zihlala ndawonye.
Ziningi izinkinga noqhekeko okungadalwa wukudla njengoba ezinye izisebenzi zingaba nenkinga nephunga lokudla okudliwa ngothile, yindlela ezinye izisebenzi ezihlafuna ngayo, nenhlobo yokudla okungahambisani nenkolo yezinye izisebenzi.
Okunye okubi okungadala inkinga enkulu wukuhala kwezinye izisebenzi. Isikhathi esiphila kusona sinzima njengoba ukudla sekubiza, ngakho-ke izisebenzi zinezindlela zokonga ukudla. Lezo ezihalayo zingaba yisicefe futhi lowo mkhuba wokuhala ungadala uqhekeko emsebenzini.
Kubalulekile ukuba izisebenzi zihloniphe ukudla komunye uzakwabo. Ayikho into eyisidina njengomuntu oqhamuka esezitapunela ekudleni kukazakwabo ngaphandle kokucela.
Nakuba ucabanga ukuthi unobudlelwano obuhle nozakwenu kodwa qinisekisa ukuthi ukhululekile ukuthi ungafaka ngokukhululeka isandla ekudleni kwakhe.
Kwesinye isikhathi nakuba ethanda ukukupha ukudla kwakhe, kodwa uma usuzithintela uyacikeka, agcine esekudikila lokho kudla. Akumnandi ukudla osekudutshi- we. Engixwayisa ngakho wukuba ukugweme ukuhala ngisho ngabe uzakwenu uphethe inhlobo yokudla ozifela ngayo. Zama nje ukuzibamba, ukhu- mbule ukuthi njengoba ekuphethe naye lokho kudla yingoba ekuthanda futhi kulingene yena. Uma wena usuzomncintela udala ukuba angadli ngokukhululeka futhi angasuthi. Okubuhlungu ngalokhu wukuthi kunozakwenu abangeke bakhombise ukuba nenkinga nokuhala kwakho ngoba besaba ukuthi kuzothiwa bayancishana kodwa eqinisweni kumele ungabi yisidina kwabanye ozakwenu, udume ngokuhala. Sonke sihlangene ngomsebenzi futhi kunenkece esiyitholayo uma kuphela isonto noma inyanga (kuya ngokuthi uhola nini).
Ngakho-ke hlela kahle imali yakho, ungalambeli kwabanye ozakwenu ngoba nabo banezinkinga zabo. Ngalokhu angigqugquzeli ukuncishana kodwa abantu kumele bafunde ukuzibamba, bangabi nezinhliziyo ezingaphandle. Okubuhlungu wukuthi kunabanye abathi bekuphethe okwabo ukudla kodwa bebe bebheke okwabanye nokuyinto engeyinhle.
Kumele nikwamukele ukuthi emsebenzini kuzohlale kukhona abazohlale bephatha ukudla okumnandi kunokwabanye.
Lokho akusho ukuthi kumele babe yizisulu zokuncintelwa ukudla. Ngiyakukhuthaza ukuba izisebenzi zihlanganise imali elinganayo zithenge ukudla zidle ndawonye. Lokhu kudala ubumbano kodwa okungaba kubi wukuthi kuqhutshwane ngamadolo kube nabagqozayo ukukhipha imali ngoba lokho kungabathena amandla abanye.
Masisebenze kahle singavumeli ukudla kusiqhathe siyizisebenzi. Ukuthi singabangani akuchazi ukuthi kumele sidle ndawonye.