IReal Kings isayinisa umgadli waseZimbabwe
Uzakhele udumo egijima kwiChiefs
IREAL Kings isayinisa umgadli waseZimbabwe ozakhele udumo egijima kwiKaizer Chiefs emizamweni yokuqinisekisa ukuthi inyukela kwi-Absa Premiership ngesizini ezayo.
IKings ihlezi endaweni yesibili kwi-log yeNational First Division (NFD) okuyibeka ethubeni elihle lokugijima imidlalo yokuhlungela ukunyukela esigabeni esikhulu. ILANGA lithole ukuthi ihlola uMichelle Katsvairo odabuka eZimbabwe ngenhloso yokumsayinisa ukuvala isikhala esivuleke kushiya uMondli Miya ojoyine iPolokwane City.
IKings izovovana inkani neRoyal Eagles koweNFD ngoMgqibelo ngo-15h30 eSugar Ray Xulu Stadium, eClermont.
UKatsvairo ufike izolo ngoLwesithathu kuleli ukuzoqala amalungiselelo okujima nale kilabhu.
UPhilani Majola oyisikhulu esiphezulu kwiKings, utshele ILANGA ukuthi basazomhlola kahle kubalwa nesimo sakhe sempilo. Uqhube ngokunxenxa abalandeli ukufika ngobuningi babo kulo mdlalo ukumboza izitha.
“Umdlalo womkhaya unzima kakhulu. Kuzomele sisebenze kakhulu kulo mdlalo. Ngiyazi ukuthi ne-Eagles ilwela ukufa nokuphila kodwa nathi sizimisele kakhulu ukufeza iphupho lekilabhu,” kusho uMajola.
Kulo mdlalo iKings ibheke ukuba uNkosingiphile “Mapo” Phewa aqhubeke nokushaya amagoli amqoka kwazise ulobizela ukumuka nesicoco somshayimagoli ovelele kwiNFD.
URoger Sikhakhane ocija i-Eagles utshele ILANGA ukuthi umdlalo wabo neKings uzokuba nzima kakhulu.
Uthi ufuna ukuthola amaphuzu akhe okuqala agcwele kulo mdlalo womkhaya.
Uthi amaphuzu agcwele azobasiza ukuxaxama endaweni embi abakuyona njengoba i-Eagles ibalwa namakilabhu avika izembe.
Isiyonke imidlalo yeNFD eqala kusasa ngoLwesihlanu imi kanje:KUSASA NGOLWESIHLANU EParow Park: Cape Town All Stars vs Super Eagles 15h30. NGOMGQIBELO EPuma: Witbank Spurs vs Richards Bay 15h30.
ESugar Ray Xulu: Real Kings vs Royal Eagles 15h30.
EMthatha: Mthatha Bucks vs Black Leopards 15h30.
EThohoyandou: Tshakhuma Tsha Madzivhandila vs Mbombela United 15h30. NGESONTO EVosloorus: Jomo Cosmos vs Stellenbosch FC 15h30.
EMakhulong: Highlands Park vs UThongathi FC 15h30.
E-Athlone: Ubuntu Cape Town vs Pretoria University FC 15h30.