Kwaze kwanzima ukuba ngunogada
MHLELI: Siyizisebenzi zezinkampani zonogada sibhekene nalezi zinkinga: wukusebenza amahora amade, sisebenza ngamaholidi, ebusuku nangamaSonto kodwa lutho ukukhokhelwa.
Sesizame kaningi ukulungisa le ndaba kodwa lutho isixazululo. Siphathiswa okwemikhovu yona etholakala ezigangeni, sixoshwa noma kanjani, kasikhokhelwa ngesikhathi. Sikhokhelwa nemali ethandwa yibona (abaqashi), bakutshela ukuthi uma unganeliseki, hamba baningi abafuna umsebenzi. Sesibhale izikhathi eziningi kodwa kasiboni lutho.
Siqale ngokubhalela uNdunankulu (waKwaZulu-Natal, uMnu Willies Mchunu) mhla zizine kuMasingana ( January) wezi-2016, simnxusa ukuba angenelele kodwa sabona ukuthi incwadi kayifinyelelanga kuyena. Siphendulwe ngumsizi wakhe ( perso
nal assistant), okuyinto esiphathe kabi. Siphinde sambhalela undunankulu mhla zili-13/09/2016 ngoba sibona kulokhu kuthulekile nje, kodwa namanje kakunashintsho basazenzela abaqashi.
Yingakho sesize sanquma ukubhalela iphephandaba. Sesihambe yonke iminyango lutho ukusizakala.
Kunezinto eziningi esifisa ukuzikhuluma kodwa kasikwazi, siyavinjwa. Okusiphatha kabi kakhulu wukubona kubanjwa inkunzi uhulumeni isidana emini kube kukhona abahlonishwa eminyangweni (kahulumeni) abayengamele, kubanjwa nezisebenzi ngobhongwane kuthiwa ziholelwa imali engaka kanti lutho.
Uma kungalandelwa kuningi okungavela. Ukuba siyazenzela ngabe oKlebe bayasondela kulolu daba. Inkinga yethu enkulu wukuthi siyabika kwezezisebenzi nakwiSecurities Industry Regulatory Authority (Sira), kodwa lutho ukusizakala.
Uma sibuza ukuthi kwenzekani, bathi sebekwenzile okwabo, indaba iseMgungundlovu. Uyothi uma ubuya kuthiwe akasekho obubike kuyena, useshiyile (emsebenzini).
Siyacela ukuba abaphathi beminyango kahulumeni basibhekelele kwezonogada.
Sinxusa abaphathi boMnyango wezeziSebenzi balubuke ngeso elibanzi lolu daba, nabakwaSira esibakhokhelayo kodwa umsebenzi kawubonakali kuthile du. Abaqashi basitshela emehlweni ukuthi uma ubopha bona kwezezisebenzi, udlala ngesikhathi yizinja zabo lezo.
Kunezinkampani eziningi esazisebenzela kodwa siphuma singaphethe lutho ngobudedengu boMnyango wezeziSebenzi. Sibona kuvuswa amaca- amadala sethemba ukuthi nawo lawa ethu asengavuka. Sifisa bonke ongqongqoshe bazi ukuthi onogada baphethwe kanjani.
Le nkinga sibona kungaba lula ukuyixazulula, uma nje ongqongqoshe bengacela ukubona ama- payslip noma kusiphi nje isisebe-nzi, bayeke ukushendeza nabaqashi. Sinxusa nongqongqoshe wezezisebenzi kuzwelonke azibhekisise lezi zisebenzi zakhe, avakashe siyomtshela.
Ababhali yithi abahleli phezu kwesiduli sinomuhlwa, onogada.