Kwethule uhlelo lokusiza u-
ISilo sigqugquzele othishanhloko
SITSHELE othishanhloko ukuba bayeke ukungabambisani nezikole abakhelene nazo iSilo uGoodwill Zwelithini Zulu ngoba sithi lokho kuba nomthelela ekwehleni kwemiphumela kamatikuletsheni.
Siqhubeka sithi kwesinye isikhathi sisuke sikhona isikole esenza kahle sakhelene nesingenzi kahle.
Le nkulumo siyisho ngoLwesihlanu, emhlangwaneni busePhoenix, eThekwini, lapho bekuhlangene khona othishanhloko abangaphansi kwesifunda iLembe, iPinetown noMlazi nezigungu ezilawula izikole.
“Ezweni lethu uthisha ukhunjulwa uma sekuphuma imiphumela ekupheleni konyaka ekubeni kade eyekelelwe unyaka wonke.
“Namhlanje ngiyaninxusa bothisha ukuba nibe ngothisha abayisifundo esihle ezinganeni ezizokhula zifune ukufana nani.
“Sifuna ukwakha imfundo yethu ibaluleke, uthisha makagqoke kahle phambi kwengane kanti nabazali mababambisane nothisha ukuze isizwe sami sihlonipheke kwezemfundo,” kusho iSilo.
IMbube ibihambisana noNgqongqoshe wezeMfundo KwaZuluNatal, uMnu Mthandeni Dlungwana, nenhloko yomnyango uDkt Enoch Nzama, kwethulwa ngokusemthethweni uhlelo lokuba othisha bafundise ngesikhathi sasebusika njengoba kuzovalwa.
Umnyango ubuchazela iSilo ukuthi abafundi basebenze kanjani esigabeni sokuqala sonyaka nezinhlelo ezikhona okuzolekelelwa ngazo kulezo zifundo okuxega kuzona.
Okunye okuvelile wukuthi kwi- website yomnyango kuzofakwa ama- video lapho kuzobe kufundisa khona othisha ababukhali ezifundweni ezithile, kanjalo namaphepha eminyaka edlule azosiza ekubeni abafundi babuyekeze abakufundile njengoba sekusetshenziswa omakhalekhukhwini abasezingeni eliphezulu.
Nyakenye iSilo, siphume umkhankaso wokuziyela mathupha kothishanhloko siyobakhumbuza ngokubaluleka kwemfundo, okwenze yenyuka imiphumela kamatikuletsheni emuva kokuba yehle iminyaka emibili ilandelana ngo-2013 no-2014.
UDkt Nzama, ubethethisa othishanhloko ethi makusetshenzwe kanzima kulo nyaka. Umnyango uzoqinisa kakhulu kulolu hlelo lokufunda nokufundisa ngesikhathi sasebusika (ngoNhlangulana - June) njengoba usuveze ukuthi imiphumela yeGeography yekota yokuqala iyethusa.
Okhulumela umnyango, uMnu Muzi Mahlambi, uthi ngokwezinhlelo zomnyango, kuzo zonke izifunda kwenziwe isikhathi lapho kuzogonqa khona abafundi basizwe ezifundweni ezahlukene.
Uthi ngalokhu kuhloswe ukuba iKwaZuluNatal yenze kangcono kakhulu. Utshele ILANGA ukuthi abafundi noma ngabe bavakashele emadolobheni, kodwa bavumelekile ukungena esikoleni okuzobe kufundwa kusona ngamaholidi.
“Siyazi ukuthi ezinye izingane zivakashela izihlobo zazo uma kuyisikhathi samaholide, ngakho-ke siwumnyango sithi umfundi makaphathe umfaniswano wakhe wesikole ozokuba yithikithi lakhe lokungena noma ngabe yikusiphi isikole okuzobe kufundwa kusona ngamaholide,” kusho uMnu Mahlambi.
Umnyango uzoqasha izindawo zokuhlala abafundi kuzona zonke izifunda ukwelekelela abafundi abazobe bekhishwe yizikole zabo ukuba beyothekela ulwazi kothisha ababukhali abazojutshwa wumnyango.