Sekuvunguza umoya we-VDJ e-Afrotainment
UMOYA weVodacom Durban July usuyavunguza e-Afrotaiment, njengoba kule mpelasonto beqale umjikelezo wabo wokugqugquzela abantu ukuba bathenge amathikithi asetendeni labo.
UDJ Tira nezakhe basabalale izifundazwe ezahlukene behambisa injabulo ebantwini ngenhloso yokubanxenxa ukuba baye kwiVDJ. Kusuka ngoLwesibili kuya ngoLwesine, bahambele imisakazo yaseMpumalanga naseLimpopo. NgoLwesihlanu bahambele iTaboo, eGoli, okuyindawo yokujabula ehanjelwa ngabadla izambane likapondo.
Injabulo ibibuzwa khona eTaboo njengoba uTira ubebophele zonke ezakhe, okubalwa iDistruction Boyz, uDladla Mshunqisi, uTipcee, uNaak Musiq, uSphectecula noNaves noBeast.
Akugcinanga eTaboo, ngoMgqibelo banikele eKapa lodumo eClub 89, nakhona bekugcwele kunyimfika, kungekho nendayo yokwedlula. Izolo ngeSonto ntambama bayivale eThekwini eYadini Lounge, eMlazi.
Kuzona zonke lezi zindawo, uDJ Tira ubebophele amaciko afanayo, kodwa isasasa belibukeka lifana njengoba abantu bebeza ubuthaphuthaphu.
UTira uthi abantu kumele bakuqonde ukuthi ukuze izinto zakho zihambe kahle, kubiza ukuba ungalali kodwa usebenze kanzima.
I-Afrotainment kulindeleke ukuba ibe nemicimbi emibili eyahlukene ngeVDJ, okuyiFact Durban Rocks ne-Afrotainment Marquee, okuyitende labo elivame ukugcwala phama.