Abalandeli bacishe banyomfa iComrades

UMthembu uvinjwe yisithuthuthu emzileni

UKUNGAKHUZEKI kwabathandi beComrades Marathon kucishe kwaphazamisa izinhlelo zikaBongumusa Mthembu ovikele lesi sicoco izolo ngeSonto kusukwa eMgungundlovu kubhekwe eMoses Mabhida Stadium, eThekwini.

Emzileni walo mjaho abantu bebengalawuleki njengoba abanye bebefuna ukumbamba ngezandla uMthembu okuyinto engavumelekile, futhi ecishe yamuphazamisa. Kukhona lapho eke wavinjwa khona yisithuthuthu ebesithwele umthwebuli. Ukungakhuzeki kwabantu kucishe kwabeka nempilo yabo engozini yokushayiswa yizimoto nezithuthuthu emzileni.

Okubi kakhulu wukuthi kulaba bantu kusuke kukhona nezingane ezincane.

Abadidiyeli beComrades Marathon, babukeka bethwala kanzima ukulawula isimo emzileni njengo- ba kuhlale kwenzeka izinto ezingabeka impilo yabasubathi nomphakathi engcupheni yokulimala.

Ngaphandle kwalokhu, umphakathi ubuphume ngezinkani njengenjwayelo ujabulela umjaho, futhi ukhuthaza abasubathi.

Nokho-ke abezindaba bavamise ukusebenza kanzima emzileni njengoba labo abajutshwe ukusebenzisana nabo befuna kuhanjwe ibanga elide abasubathi bengabonwa nangokhalo.

Kwesinye isikhathi bafuna kwenzeke intando yabo engahambisani nendlela abezindaba abasuke befuna ukusebenza ngayo.

Sebebonke abagijimi besilisa abangene kwi-top 10 ngokulandelana bami kanje: 1.Bongumusa Mthembu, 2.Joseph Mphuthi, 3. Steven Way, 4.Edward Mothibi, 5.Marko Mambo, 6.Gordon Lesetedi, 7.Tebogo Sello, 8.David Gatebe, 9.Gift Kelehe 10. Nkosinathi Duma.