KUDUME UPOTIYANE KUPHAHLAKA 'IBHANOYI'
"Ngingeniswe wukubona abantu beyikha ngamafosholo imali"
KUDUME amakhanda, kwakhala abantu ngoMsombuluko eDumbe emuva kokuba befike kukhala imbungane, kulenga ingidi emahhovisi ebhanoyi, "abebeligibele". Kuthiwa abantu bakhushukelwe wushukela kule ndawo naseVryheid kuphahlazeka ibhanoyi okuthiwa liwe nezizumbulu zemali yabo, abanye bekumele bayithole ngawo uMsombuluko.
Leli bhanoyi ebelaziwa ngeMoney Stockvel, kuthiwa liqale ngonyaka odlule eDumbe, kodwa ngokubona isibalo sabantu sikhula, lakapakela eVryheid. Umthombo weLANGA - nawo obufake imali kule ndiza - uthi uzwe kushwaqa izinwele uma uthola umyalezo wokuthi asethuthile la mahhovisi, okuthe uma unikela kuwona, wafica inqwaba yabantu ikhala.
Ngokuthola kweLANGA, imali yokungenela leli bhanoyi ibiqala ku-R550 kuya phezulu. Umthombo uthi ngokwemiyalelo yakhona, u-R550 ububuya usuwu-R1 000 emuva kwezinsuku eziwu-15. “Baphelile abantu lapha, ngikhuluma nje nami ngesaba nokuvela ukuthi bengikulesi sitokofela njengoba sihambe no-R13 000 wami.
"Ngiqale ukuzwa ngaso ngoLwezi (November) ngonyaka odlule, abantu bebeyikha ngamahalavu imali, okugcine sekungithatha nami. Ngesikhathi siqala, ngike ngaba nakho ukungabaza ngoba ngazi ukuthi abantu balahlekelwa yimali kulezi zinto. "Ngifake u-R13 000 obuzobuya usuwu-R25 000 emuva kwezinsuku eziwu-15.
Omunye ohanjelwe yimali yakhe - ocele ukungadalulwa - uthi naye ubezitshela ukuthi leli bhanoyi lehlukile kulawa avame ukuba khona, agcina ebaleka nemali yabantu.
Uthi phambilini uke wayithola le mali kodwa ngoMsombuluko uphelelwe ngamandla uma ezwa ukuthi selithuthile ihhovisi. USolwazi Bonke Dumisa, oyisazi kwezomnotho, uthi abantu kabafuni ukuzwa ngamabhanoyi yize sekukaningi bexwayiswa ngawo. Uthi ngokujwayelekile u-78% wabantu abasuke befake imali emabhanoyini, kabayitholi inzuzo ngoba ayawa.
“Abantu abahlomulayo ngabasuke bejoyine kuqala. Ingozi ngamabhanoyi wukuthi kawekho emthethweni kanti nohulumeni unelungelo lokuyithatha imali esuke ifike ngale ndlela ngoba kayikho emthethweni.
"Into eyenza ukuba awe, yingoba abanye abantu bayaphuma uma sebethole imali yabo, okugcina kwenza bangabe besakhokheleka abanye,” kusho yena.
Uveze ukuthi abanye bagibela kuwona amabhanoyi bazi kahle ukuthi angawa noma yinini. UMnu Bongani Tembe, woMnyango wezokuThuthukiswa koMnotho KwaZulu-Natal, uthe akhona amahhovisi abanawo lapho abantu bengahambisa khona izikhalo zabo ukuze umnyango uzophenya.
Uthi la mahhovisi akhona eDundee, oNdini nakwezinye izindawo.