KUFUNWA IZIHLOBO ZOSHAYWE WUMPHAKATHI
KUFUNWA umndeni wowesilisa olinganiselwa eminyakeni engu-35 ubudala, oshaywe wabulawa wumphakathi emuva kokubanjwa egqekeza.
Kubikwa ukuthi lona wesilisa, ogama lakhe linguBonginkosi Zondi, waseMatendeni, eNanda, ubanjwe egqekeza komunye umuzi oseCharlottedale, eThembeni, KwaDukuza.
Ngokwesitatimende samaphoyisa, umphakathi umbambile wamthela induku.
Kuthiwa uphuthunyiswe esibhedlela lapho eshonele khona.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa aKwaDukuza avule icala lokubulala nelokugqekeza.
Kucelwa noma ngubani ongaba nolwazi ngomndeni kamufi ukuba axhumane noSergeant Nkosikhona Mavundla ku: 073 855 6833/ 032 551 8208 noma ashayele inombolo yamahhala ethi: 086 001 0111
*Khonamanjalo, kulindeleke ukuba avele namuhla ngoLwesine eNkantolo yeMantshi yaseThekwini umnikazi wetekisi waKwaMasxha, eChesterville, ngamacala okuzama ukubulala, elokutholakala nesibhamu esinezinhlamvu esingekho emthethweni nelokucekela phansi impahla.
Kubikwa ukuthi owesilisa oneminyaka ewu36 waseCato Manor ubesesitolo ngoLwesibili ngesikhathi kuqhamuka umsolwa omkhuthuze emaphaketheni maqede wamdubula esandleni.
Khona kulesi sigameko kuphinde kwadubuleka nomunye oneminyaka ewu-39. Bobabili laba baphuthunyiswe esibhedlela.
Ngalo uLwesibili, amaphoyisa abophe owesilisa oneminyaka ewu-40 esemzini wakhe, KwaMasxha, mayelana nalezi zigameko.
Umsolwa utholwe nesibhamu esingekho emthethweni nezinhlamvu.