SEBEXHASWE NGEMIBHEDE
ZITAKULWE yinhlangano yabakhubazekile izingane zesikole sabakhubazekile, iMount Fletcher Special School, esiseXaxazana, eMount Fletcher, e-Eastern Cape, izinikelela ngemibhede emisha ewu-18 ngeledlule.
Kuthiwa selokhu saba khona lesi sikole, laba bafundi bebelala ezipontshini, kwaze kuba basizwa yi-Eastern Cape Disability Economic Empowerment Class (ECDEEC) ngemibhede.
Lolu xhaso iECDEEC ilukhiphe ngokulekelelwa ngabakwa-Engen. Lo mcimbi ubuhanjelwe nguNgqongqoshe wezeMfundo e-Eastern Cape, uMnu Mandla Makupula, yilungu lesishayamthetho kulesiya sifunda uNkz Ntombovuyo Nkopane, yisikhulu sakwa-Engine, uNkz Loyiso Ngoqo noMnu Thabiso Phetuka oyisikhulu esiphezulu kwi-ECDEEC.
“Abaphila nokukhubazeka bangabantu nabo njengathi futhi sonke siphila ngaphansi kwamalungelo afanayo, kodwa inkinga ikwabanye bethu ngoba ngisho noma sebebabiza ngamaganyana,” kusho uMnu Phatuka.
Uthi ngenxa yokuhamba kancane kwezinhlelo zomnyango wezemfundo njengoba kunemigomo elandelwayo uma kuthathwa izinqumo, banqume ukuthatha imali abaxhaswa ngayo yi-Engen.
Bayisebenzisa ekuthengeleni izingane le mibhede ngoba isimo sazo besingesihle, kwazise bezilala phansi kumakhaza.
Unxenxe izinyunyana ukuba zibambe iqhaza ezinhlelweni zabakhubazekile ukuze zishintshe isimo.
UMnu Makupula uthe bajabula kakhulu uma kunezinhlaka ezithintekayo bese ziphosa itshe esivivaneni ukusiza emsebenzini obekufanele wenziwe wumnyango wakhe.
“Ngizizwa ngihlazeke kakhulu ngoba konke lokhu okwenzeka lapha bekufanele kwenziwe wumnyango wami,” kusho uMnu Makupula.
Ugxeke izisebenzi zeminyango kahulumeni ezihudula izinyawo wathi kufuneka zazi ukuthi kazilimazi umnyango kuphela, kodwa zilimaza imiphakathi.
Mayelana nemibhede ethengiwe, uthe umnyango wabo uthenge amashidi, wathembisa ukuthi bazokwakha ikhishi eliwumahamba nendlwana njengoba izingane kuthiwa ziphekelwa ezindlini ezilala kuzona. Uthe uzothenga namathangi amanzi wathembisa nokulungisa isikole.