Utshwala bungakugijimisa iComrades Marathon ungazelele
SIGUDLA NOGALAKAJANE: ABDUL MILAZI
KULO nyaka bengithi ngizogijima lo mjaho obizwa ngeComrades, nami ngiyoquleka nabaqulekayo phambi kukazwelonke kumabonakude. Phela baningi abantu abaya kulo mjaho ukuyoquleka nje kuphela ukuze bezophuma kumabonakude.
Umuntu uthi engakaze nje nangolulodwa usuku agijime ngisho ukuya ezitolo, kodwa acabange ukuthi angagijima ukusuka eMgungundlovu aze ayofika eThekwini.
Kangazi basuke bebheme nhloboni kagwayi. Phela lo mjaho kawubhenywa ungeyona intshokovane. Nami ngangizidlele mhla ngithatha lesi sinqumo sokuwungenela kulo nyaka.
Ngazibona sengiphethe imbali - lena abayinika abanqobi - ngiyibambe ngamazinyo, izandla zisemoyeni nginanela ihlombe lezihlwele enkundleni iMoses Mabhida.
Ngibabona nje futhi nabangani bami bengilinde ngobandayo ubhiya ukuze ngehlise izithukuthuku. Izintatheli zamaphephandaba nezomabonakude zithatha izithombe zingaqedi, phela ngoba ngalolo suku nje olulodwa bengiyobe sengiphenduke isilomo somsubathi.
Yimi loya sengiyobhalisa phela ngimafulufulu ngilandela iphupho lami. Lelo phupho lashabalala ngokuphazima kweso uma bengitshela ukuthi kumele ngiqale ngokugijima lemijaho okuthiwa yiTwo Oceans neSoweto Marathon, futhi ngiqede ngesikhathi esinqunyiwe.
Ngathi uma ngibatshela ukuthi mina kanginandaba nalena eminye imijaho, ngifuna yona iComrades lena, bathi cha ilanga lingawa licoshwe yizinkukhu.
Ngikhumbula lo mjaho kudalo, eziningi izinsizwa engakhula nazo ebezingamalungu e-IFP, zazingafuni nokuwubona zithi zona kaziwona ama- comrade, futhi kaziwafuni nalapho ehambe khona amaqabane.
Zazithi lo mjaho ngokaKhongolose, i-ANC phela, ngakho ngeke zona zigijime nama- comrade, kuyoqhuma nhlamvana ezinye ziyofekela. Ngaleyo minyaka wawuke uzibone nje nezidudla nezinsizwa ezisho ngontabakayikhonjwa yemikhaba, bonke bekhwishizela beya phambili. Njengoba umkha- ba ngingakawutholi lapho uthengwa khona, bebekhona phela nami ebengizobashiya ngemuva.
Uma ngibona ukuthi cha sekunzima kanti nobhiya usufuna ukubuya ngaphezulu, ngimane ngicele u- lift kwi-ambulense, ngicele bafake ugologo kwi- drip ukuze ngiphuze ngemithambo yegazi. Phela kayikho into ugologo ongakwazi ukuyilungisa.
Uke ubone nje noma kuhlatshiwe izinsizwa zikhathazwe yilanga zihleli phansi kwesihlahla, uma uke wazinika utshwala, amandla abuya ngokuphazima kweso, uzibone sezigiya zize ziqethuke - ilanga lelo zingasalizwa nokulizwa.
Kangisho kodwa ukuthi abasubathi mabasebenzise utshwala bathi bezwe ngami. Yingakho mina ngikhethe ukuwubukela lo mjaho kumabonakude njengenhlalayenza.
Ungikhathaza ngiwubuka nje ngihleli kusofa. Abawuthandayo nabanamandla nogqozi nofuqufuqu, mabagijime, thina siyobabukela. Kunensizwa engiyaziyo, engingeke ngayibiza ngegama, ekhethe ukugijima kulo nyaka. Iqale ngokufaka izimemezelo kuFacebook kodwa kangizange ngiyibone kumabonakude ngelanga lomjaho, okusho ukuthi ishaye ifambu.
Phela izintatheli ziveza labo abenza kahle kuphela, kazinandaba nalaba abashuduzayo kungabonakali ukuthi benzani.
Ngisalindile ukuzwa ukuthi iwuqedile yini ngoba phela kangiyazi ingumuntu ogijimayo nodlala nje ngisho ibhola lezinyawo, elezandla noma elomphebezo. Mhlawumbe iphelele eshibhini eThekwini.
Phela kayibizwa lapho kunuka khona utshwala, iyaziyela, kanti ayibuhlabeli okwala emhlabeni. IwuBruce Fordyce ezinkambeni zikaFaroah. Kungakho ilithakasela kakhulu leli holide lotshwala okuthiwa yiJune 16.
Leli holide phela selaphenduka usuku lwezidakwa ngenjoba sekwangena inkululeko. Uthola ngisho nezingane zesikole zidakwe zingasazi ngisho namagama azo. Lafa elihle kakhulu!
Kangazi basuke bebheme nhloboni kagwayi. Phela lo mjaho kawubhenywa ungeyona intshokovane.