Kusolwa iPirates ngokungayeseki ekaMeyiwa
UJerry Skhosana ukholwa wukuthi bekumele kugqame iBucs
UJERRY “Legs of Thunder” Skhosana ubona bungazange bube khona ubulungiswa ngokungabonakali kwe-Orlando Pirates ukuzogubha usuku lokukhumbula uSenzo “Nzori” Meyiwa odlale enkulu indima kule kilabhu eholwa ngu-Dkt Irvin “Iron Duke” Khoza.
Lo mcimbi wokuhlonipha uMeyiwa owadlula emhlabeni ngo2014 eGoli, ubungoMgqibelo eKing Zwelithini Stadium, eMlazi.
USkhosana utshele ILANGA ukuthi ubona bungazange bube khona ubulungiswa ngokungafiki kwezikhulu zePirates kulo mcimbi.
Uthi yize engaqondile ukugxeka iPirates kodwa ngokwakhe bekuzokuba yinto enhle kakhulu ukuba kudlale ipiki kaMeyiwa mhlawumbe nesikwati seBucs.
Uzeseke ngokuthi uMeyiwa ubedlalela iBucs hhayi iKaizer Chiefs, iLamontville Golden Arrows, iMaritzburg City kumbe amanye amakilabhu abemelwe kulo mcimbi. Uthi ngokwakhe ukholwa wukuthi bekumele kugqame abadlali beBucs.
“Umuntu ofana nami bekumele adlale kule piki. Kangisitholanga isimemo esiqondile, ngizwe ngamahemuhemu emgwaqeni ngenxa yomsebenzi wami wakwaHollywood Bets, ngase nginquma ukuba ngize ukufaka umdlandla kulabo ababambe iqhaza. Empeleni sinalo iqembu lezingwazi kwiBucs, kuyiphutha elikhulu ukuthi singabi khona (njengeBucs).
“Okubi wukuthi ezinye izingwazi ezingekho lapha kuzoziphatha kabuhlungu ukuthi bekuhlonishwa umuntu onjengoMeyiwa zona zingekho,” kusho uSkhosana.
Uthi abagqugquzeli kumele bafunde kakhulu kuleli phutha ngoba yinto esaqala.
Uthi unelikhulu ithemba lokuthi ngonyaka ozayo izinto zizojika futhi zilungiswe ngendlela. Uthi kube yisimo esibi kakhulu ukuthi kucishe kubhuntshe umcimbi ngenxa yokuthi kukhona abebethenjiswe imali kodwa kwagcina bengayitholanga. Uthi yingakho engathandanga ukuba yingxenye ngoba sekukhulunywa ngemali.
Uthi ngokuqonda kwakhe lo mcimbi bekuqongelelwa ngawo imali yesikhwama esizosiza umndeni kaMeyiwa.
UFloyd “Jomo” Mbele oyisikhulu esiphezulu kwiPirates, ushaye ngamafuphi wathi uma uSkhosana kukhona ukunganeliseki kumbe enombono ngento ethinta iBucs, uyayazi iminyango kumbe imigudu okumele ayilandele. Uthi ngeke bakwazi ukuphawula entweni engekho phambi kwetafula le kilabhu.