Umshumayeli ubulawe kunomcimbi kubo
Uthe angafulathela nje abasolwa bamdubula amahlandla awu-7
UPHELE sekumuncu umsebenzi wokubuyisa abadala, obekuhlatshwe kuwona izinkomo ezimbili kwaGwala, eMlaba Village, eHammarsdale, ngoMgqibelo ntambama, ngesikhathi kudutshulwa kubulawa indodana yakhona engumshumayeli eFree African Congregetional Church.
UMnu Xolani Gwala (41), kubikwa ukuthi udutshulwe amahlandla awu-7 ngabasolwa abaqale banklunkla utshwala bomsebenzi emuva kwalokho basusa uthuthuva. Uphangalalele endaweni yesigameko.
Ekhuluma neLANGA ngoLwesibili, umfowabo omdala kamufi, uMnu Bonginkosi Gwala, uthe: “Kuthe sekuntambama sekuqala ukuhwalala, abantu sebeqala ukuhlukana, kwabakhona abafanyana abaqhumisa isibhamu egcekeni.
"Ngaleso sikhathi umfowethu obehleli namanye amalungu omphakathi, usondele kulaba bafana eyobakhuza ethi bazothusa abantu abeze emcimbini, kukhona nabantu abadala asebekhulile abazokwethuka bezwa umsindo wesibhamu,” kusho uMnu Gwala.
Uthi abasolwa bagolozile ngesikhathi umufi ebakhuza, wabashiya kanjalo bemile ethi ubuyela lapho ebehleli khona. Ngesikhathi ebafulathela nje, bavulele ngentululwane yezinhlamvu emhlane qede bashaya bachitha.
Kuthiwa abasolwa benza lo monakalo nje, imini yonke bebesemcimbini bezicima ngotshwala nenyama yakwaGwala.
“Umfowethu ubengezwani nomsindo. Nangesikhathi ebakhuza ngokuqhumisa kwabo isibhamu egcekeni, ukhulume kahle nabo, akazange abalwise. Sibuhlungu siwumndeni ngendlela abambulale ngayo, ungafunga ukuthi bekudutshulwa esinye isigebengu,” kusho yena.
ILANGA lithole ukuthi abantu abasolwa ngokwenza lokhu, ngabafana abancane omunye wabo usanda kulaxaza isikole efunda uGrade 9.
Kuthiwa bayaziwa endaweni ukuthi bashiswa yizibhamu, badubula kwasani oluphambi kwabo.
UMnu Mthokosizi Manqele obesondelene kakhulu nomufi, uthi baqale bangakholwa uma betshelwa ukuthi usedutshulwe wabulawa.
"Bengingakholwa ngoba bengazi ukuthi isibhamu naye yizinto eziqhelelene futhi engumuntu wenkolo, enjalo nje enomoya ophansi. Siyafisa ukuba amaphoyisa ababambe abasolwa, baboshwe ngoba sesitholile ukuthi kakusona isigameko sokuqala lesi bedubula ilungu lomphakathi,” kusho yena.
Okhulumela amaphoyisa KwaZulu-Natal, uCol Thembeka Mbhele, uthe amaphoyisa asevule icala lokubulala, bekungakaboshwa muntu.
Akazange aze abalwise beqhumisa isibhamu egcekeni, ubakhuze kahle.