Uthisha "ushaywe ngempama"
Umfundi usale ephuke unyawo
KUXABENE ubendle eThornwood Secondary School, eThornwood, eMariannhill, osekuphele amasonto amabili othisha bengangeni emakilasini ngoba bezwelana nozakwabo olaliswe esibhedlela okuthiwa ushaywe ngumfundi ngempama.
Kubikwa ukuthi indaba iqale ekilasini emasontweni amabili edlule ngesikhathi kusuka ingxabano phakathi kukathisha wesifazane nalo mfundi (17) (esiligodlile igama lakhe ngenxa yeminyaka yakhe, yaphetha ngokuthi basongelane.
Kuthiwa kuthe kuphuma isikole, uthisha washayisa lo mfundi ngemoto, emuva kwalokho yadla amagalani, emshiya elele. Kuthiwa ngelanga elilandelayo, lo mfundi unikele esikoleni wafika wavulela ngempama kulo thisha maqede walaliswa esibhedlela.
Kusukela kwenzeke lesi sigameko, othisha bashaya phansi ngonyawo bathi kabangeni amagunjini okufundisa lo mfundi esengaphakathi.
Izolo ekuseni ILANGA lihambele kulesi sikole lafika abafundi besaphazeke egcekeni, kubonakala ukuthi bazipholele akufundwa, othisha bebengabonwa emagunjini okufundela.
UMnu Sphamandla Shozi, oyisekela-sihlalo leCongress of South African Students (Cosas) esifundeni seTheku, uthi bakhathazekile ngale mibiko abayithola ngesigameko esenzeke kulesi sikole.
Uthi ngoLwesibili bekunomhlangano phakathi kwabo neSadtu ukuzama ukuthola isixazululo kulolu daba.
“Ngokuzwa kwethu, umfundi nothisha babe nokuhilizisana ngaphakathi esikoleni, kuthe sekuphuma isikole, uthisha washayisa umfundi ngemoto waphuka umlenze. Okusidida kakhulu wukuthi ukwenze lokhu maqede washaya wachitha.
“Umfundi uze waqukulwa ngabanye bamgodukisa, emuva kwalokho waphuthunyiswa esibhedlela. Ngakusasa umfundi uye esikoleni wafike washaya uthisha. Kuyasixaka-ke ukuthi othisha bashiye ukufundisa ngoba befuna kuhambe lo mfundi, kodwa kukhohlakale ukuthi naye uthisha ubenephutha ngokushayisa umfundi.
“Thina esikushoyo wukuthi uma umfundi ehlaliswa ekhaya, naye uthisha makahlale ekhaya kuze kuxazululwe lolu daba,” kusho yena.
Umfundi uvumile ukuthi uke waba nengxabano nothisha esikoleni ngaphambi kokuba amshayise ngemoto.
“Ngesikhathi sixabana, ungitshele ukuthi uzongikhombisa kanti ntambama uzongishayisa ngemoto,” kusho lo mfundi.
UNobhala weSadtu KwaZuluNatal, uNkz Nomarashiya Caluza, uthe bazwile ngalesi sigameko kanti izingxoxo zisaqhubeka phakathi kweSadtu neCosas ukuzama ukulungisa udaba.
“Kuliqiniso ukuthi othisha basamile ukufundisa emuva kwalesi sigameko sokushaywa kukazakwabo. Ziyasikhathaza izigameko ezinjena ngoba kokunye othisha baze babulawe ngabafundi, kodwa-ke izingxoxo zisaqhubeka ukuzama ukulungisa lolu daba,” kusho yena.
Ukuqinisekisile ukuthi uthisha ulaliswe esibhedlela emuva kwalesi sigameko.
Okhulumela uMnyango wezeMfundo, uMnu Muzi Mahlambi, uthi umnyango ubungakezwa ngalolu daba kodwa usazoxhumana nehhovisi lomnyango kuleya ndawo ukuze uzothola umbiko ogcwele ngalesi sigameko.
Kwenzeka lokhu nje, ngoMbasa (March) 2007, uthisha waseThornwood Secondary, uNkz Nokulunga Ndala owayeneminyaka ewu-28, wagwazwa wabulawa ngumfundi, uMazwi Mkhwanazi, owayeneminyaka ewu-18 ubudala ngaleso sikhathi. Nakhona indaba yasuka ngokuxabana ekilasini.
Lo mfundi wagwaza uNkz Ndala kubuka abanye abafundi. Sekuwumlando ukuthi uMazwi wagwetshwa yiJaji Vuka Shabalala iminyaka ewu15, kwalengiswa ewu-5. Ziningi izigameko ezibikwayo zokushaywa kothisha ngabafundi kodwa kugcine kuphelele emoyeni.
Uma umfundi ehlaliswa ekhaya, naye uthisha makahlale ekhaya.