Ufunde lukhulu kuKaMadonsela
UMLINGISI emidlalweni kamabonakude uFundiswa Zwane uthi ziningi izinto ezingashintsha umuntu wesifazane, agcine esenza izinto abengakaze acabange ukuthi angazenza empilweni yakhe. Lo mlingisi onguKaMadonsela emdlalweni owuchungechunge Imbewu: The Seed, osakazwa kwi-e.tv phakathi nezinsuku usho lokhu echaza ngale ndawo ayilingisayo esematheni kulezi nsuku. Isenzo sakhe kulo mdlalo sokuthithibalisa umyeni wakhe uPhakade ngenhloso yokulungisa umndeni wakhe yiso esenze uKaMadonsela wasematheni kubalandeli balo mdlalo. UKaMadonsela ushiye ababukeli balo
mdlalo beshaqekile, abanye bezwakalisa ukungabe besamthandisisa kahle ngenxa yesenzo sakhe abasithatha njengesokuthakatha. Kuvamisile ukuthi ababukeli bagcine sebezonda umlingisi uqobo lwakhe, bakhohlwe wukuthi asuke ekwenza kumabonakude kusuku kuyingxenye yomdlalo, hhayi ngoba kuyinto eyenzeka ngampela.
Echaza ngale ndawo uFundiswa, uthi abantu besifazane bahlangabezana nezinto eziningi babekezele kuze kufike lapho behluleka khona.
“Okungichazayo ngendawo kaKaMadonsela wukuthi akukhona ukuthi usehlulekile ngesimo abhekene naso kodwa lokhu akwenzayo uzama ukulungisa isimo.
“Khumbula ukuthi imfihlo esanda kuvela ngomyeni wakhe onezingane enkosikazini kamfowabo akayamukelanga kahle,” kuchaza uFundiswa ngendawo ayidlalayo.
Ezichaza ukuthi ungumuntu onjani, uthi wehlukile kakhulu kunale ndawo ayilingisayo. Uthi kodwa kunezinto azifundayo ngokulingisa le ndawo.
“Mina angishadile ngakho ukudlala indawo yomuntu oshadile kuyangikhulisa,” kusho lo mlingisi ozalelwe wakhulela ePort Shepstone.
Uthi ukulingisa yinto akhule ezifela ngayo, yingakho nabazali bakhe bekhombise ukumeseka ukuze afeze iphupho lakhe. Ngaphandle kokulingisa kulo mdlalo unebhizinisi lokukhiqiza imidlalo, yeshashalazi.
“Kumele nabanye abalingisi bakuqonde ukuthi kunamathuba ebhizinisi kulo mkhakha wezobuciko. Kumele bangalindi ukuqashwa ukuze baphile kodwa mabaziqalele okwabo okuzobangenisela imali,” kusho uFundiswa oyintokazi ezwakala ikhululekile futhi enomoya omuhle.
Uthi usanda kuthola ukuthi unobizo kodwa okwamanje akakazimisele ukuphawula ngalo kwabezindaba.
“Okwamanje ngingasho ukuthi ngisohambeni olujulile ngokwempilo kodwa kusenezinto okusamele ngizilungise ngaphambi kokuba ngikwazi ukuphawula ngalo ngokugcwele.
“Okuhle wukuthi bonke abasondelene nami sebeyazi ngobizo lwami kanti okuthokozisayo wukuthi bayangeseka,” kusho lo mlingisia ongacacisanga ukuthi uhambo akulona olokuthwasa noma ngolunye uhlobo.
UFundiswa akamusha emkhakheni wokulingisa njengoba eseke wabonakala emidlalweni eyahlukene okubalwa kuyo, owuchungechunge iGenerations; owamahlaya i-Its For Life obukhonjiswa kuMzansi Magic; ne-Traffic ebikhonjiswa kwi-etv.