AYANDA BUTHELEZI:
AKAZENYEZI ngokuqhakambisa amandla edlozi lakhe endleleni yempumelelo uJacinta Ngobese (31), ongusomabhizinisi ofufusayo. Le ntokazi yaKwaMashu, enenkampani iJacinta Media, ayibhalise ngokusemthethweni ngo-2015, ithi yize ngokwemvelo ingumuntu ophokophelayo empilweni kodwa ukukhula kuyifundise ukuthi kusona sonke isinqumo esenzayo ngempilo yayo, inganaki ukuthi abantu bazothini kodwa igxile kulokho okuzozuzisa yona.
Kuningi ematasa ngakho kulezi zinsuku okuphathelene nebhizinisi nokufukula umphakathi, abekusheba nemfundo njengoba ngonyaka ophelile ebethweswa iziqu ze-BA Degree in Public Administration and Management, abezenza e-University of KwaZuluNatal.
Uyachachamba ebusweni uma ekhuluma ngesinqumo sakhe sokubuyela esikoleni emuva kweminyaka engu-8 ashiya phakathi ukufunda ngenxa yokuthi lwase lumtinyelile udosi lwezikaqedisizungu nokungcebeleka.
“Wonke umuntu umatasa ngokuzozuzisa impilo yakhe, yingakho kungamele uphilele omunye umuntu kodwa wenze lokho okuqondene nawe ngoba lena impilo yakho. Yingakho ngigcine ngikhethe ukubuyela ngokugcwele esikoleni ngiyoqedela izifundo zami. Ngiyaziqhenya ngalesi sinqumo njengoba ngigcine ngisitholile isicucu sami sokuqala engiziqhenya ngaso,” kusho yena.
Uwasho lawa mazwi ebuyekeza nezinye izivivinyo adlule kuzona empilweni kusukela kuzalwa indodana yakhe esineminyaka engu-8 manje, kuze kufike isikhathi lapho ephelelwa khona umsebenzi wokuba ngumsakazi weradio.
Uthi lezi zigemegeme yizona ezimkhulisile empilweni, zagcina zimvule amehlo okuthi abhekane ngqo nezinto eziqondene nesintu.
“Ngiyalihlonipha idlozi futhi ngikwenza konke okumele ngikwenze okuphathelene nalo ngoba liyisisekelo sempilo yami. Selokhu ngaqala ukwenza izinto eziphathelene nalo, impilo yami kayisafani nakuqala futhi kuningi okwembulekile empilweni yami.
IZIKHATHI EZINZIMA
Ubalule unyaka u-2011, no-2015 njengeminyaka ayaba nzima kakhulu empilweni yakhe.
“Ngo-2011 ngikhulelwe ngaba sengozini yemoto, okwaholela ekubeni ngichithe izinyanga ngingaholi. Kuleso siphithiphithi odokotela bangitshela ukuthi ingane yami izozalwa iyisidalwa ngenxa yomthelela wengozi. Ngaphezulu kwalokho ngangibhekene nesikhathi esinzima ebudlelwaneni bami noyise womntwana.
“Kukho konke lokho ngalidonsa ijoka lempilo ngoba kwakumele ngiqine, kwazise yimina omdala futhi owondlayo ekhaya njengoba ngihlala nogogo (8O) ophila nesimo i- dementia, izingane zasekhaya nabantwana bami.
“Ngiyiqhubile impilo ebibukeka ingeyejwayelekile futhi nami ngibukeka ngithokozile emehlweni abantu. Ngisebenzile ngokuzimisela ngesikhathi ngiyingxenye yemisakazo engidlule kuyona okubalwa iGagasi FM neVuma FM, nginephupho lokuzakhela igama elihloniphekile emphakathini futhi lokho ngakwenza ngempumelelo,” kusho uJacinta.
Yize igama lakhe ligqame kakhulu ngesikhathi esesemsakazweni futhi anesifiso sokubuyela kuwona uma ithuba livela, kodwa uthi kwakungesilo iphupho lakhe ukuba ngumsakazi.
“Ngangena kulo mkhakha sakudlala ngizwa ukuthi kunethuba lenhlolokhono kwi-UKZN Radio. Ngangena ngazimisela futhi ngasekwa kakhulu ngozakwethu okunguSizwe Blose noSi
pho ‘Sgqemeza’ Mbatha,” kusho yena.
Uthi kumanje ukuleli zinga akulo ngakho ukwesekwa ngoba ukuba bekungekho abantu abathile empilweni yakhe nangesikhathi ephelelwa wumsebenzi ngabe akekho lapho ekhona njengamenje.
“Bayidlanzana abantu abakufisela impumelelo empilweni ikakhulukazi uma usemehlweni abantu. Abanye bazitshela ukuthi bangakhuluma noma yini ukudicilela phansi igama lakho, bakhohlwe wukuthi nawe ungumuntu onemizwa futhi lokhu abakujikijela ngakho kungagcina sekukukhubaza uze ugcine usungenwe wukhwantalala,” kuqhuba yena.
UBUDLELWANE BOTHANDO
Ube esethinta kancane indaba yokuhlukana nesoka lakhe ebelingumdansi, elaziwa ngoFah, wathi kwesinye isikhathi ubudlelwano bushabalala bungakapheli ngokusemthethweni.
“Angizisoli ngesinqumo sokubuqeda ubudlelwano. Kwesinye isikhathi sikhetha ukuziziba izinkomba zokuthi ikusasa alikho size sizibe nalabo abasondelene nathi abasicebisayo. Nokho sigcina sifikile leso sikhathi esifanele sokuthi ushiye. Nami sangifica futhi angizisoli ngaso,” kusho uJacinta.
Kumanje uJacinta umatasa ngezinhlelo zebhizinisi lakhe futhi umatasa nangomcimbi waminyaka yonke obizwa ngokuthi ‘We Are One’ owenzelwa elokishini KwaMashu, okuzoba ngokwesine wenzeka kulo nyaka.
Ngaphandle kwalokho umatasa ngezinhlelo eziningi eziphathelene nentsha esezikhungweni zemfundo.
Le ntokazi evuke yazicosha idlulise umyalezo kulabo abangayifiseli okuhle yathi: “Ngiyabonga kubo bonke abebejabula bethi ngiwile. Ngiyethemba nithule niyabuka futhi niyamangala. Ngikwenzile ngaphumelela ngiyafisa nani nibusiseke,” ephetha.